Read kumam Yobu 27 Bible Online

Yobu 27 - kumam bible

Yobu 27

¹Yobu di bobo oko meede kede yamo di ewaco be,

²“Tek di pwodi Rubanga tie kuo, en ngat kame etieko kwanyo twero nango, doko en Rubanga Won Twer ngat komio cunya obedo kec,

³tek di pwodi ango akuo, di uma tie kede wei kame Rubanga mio,

⁴doga likame bino yamo kop me abe, doko leba likame bino yamo kop me angalo.

⁵Ango likame abino yei be kop wu tie kakare; tuno to ango likame abino weko bedo dano aber.

⁶Ango amoko kitek i kom poore na, doko likame abino weke akadi acel; cunya likame pida i ceng moro acel me kuo na.

⁷“Ango akwao be mi ngakwor na nen can bala jo areco, doko akwao be mi ngat kame yi keda nen can bala jo kalikame opoore.

⁸Pien gen nyo kame dano akwia Rubanga tie kede kame kojiko kuo mere, kame Rubanga okwanyo kuo mere?

⁹Iparunu be Rubanga bino winyo koko mere ka peko opoto ne?

¹⁰Benyo, cunye bino bedo yom kede Rubanga Won Twer? Iparunu be ebino donyo kwano Rubanga i kare dedede?

¹¹Ango abino pwonyo wu i kom twer ka Rubanga; ango likame abino mungo iik kame Rubanga Won Twer tie kede.

¹²Wun dedede itiekunu neno kede wangu; aso pinyo kamio wun iyamunu kop akony gi li.”

¹³“Man en iner kame Rubanga mio jo areco, doko en gikame jo katero jo kirac udo kibut Rubanga Won Twer.

¹⁴Ka idwe gin odoko tot, koneko gi kede epima; doko idwe gin likame bedo tie kede cam aromo gi.

¹⁵Jo gin abwot mege aumpuli neko, doko apuserun gin likame koko gi.

¹⁶Akadi gin kicok nyonyo siliba di tot bala asinge, di kiko coko igoen atukit bala lobo;

¹⁷gin bo kikaruno coko gi di kitot, do jo kopoore en abino ngapo gi, doko jo kalikame tie kede raco moro en kame bino popoko nyonyo siliba nogo.

¹⁸Gin kigero ude gi bala ude me winy, bala aduc kame jodar poto me olok gero.

¹⁹Gin kioto buto di kitie jo obaro, do likame bobo ebino meede bedo kamanono; gin kibino cei di kiko udo be abar otieko doko li.

²⁰Lworo ngoole mako gi bala ariram, apipiru koporo gi tenge iwor.

²¹Yamo kame buko wok ki tetu kide koporo gi di eko kato kede gi; en ekuto gi tenge ki kabedo gi.

²²En ebuko i kom gi abongo kisa; gin kitamakino ringo tenge kede teko gi dedede pi mito bwot.

²³Yamo mor i kom gi bala dano abapo cinge di eriamere kede gi; doko ewinyao negi bala dano i kabedo dedede.”