Read kumam Yobu 28 Bible Online

Yobu 28 - kumam bible

Yobu 28

¹“Ateteni bur kame kokunyo kiye siliba tie, doko kabedo kame kojililo kiye saabu da tie.

²Kokunyo kide me nyonyo ayon ki lobo, doko kocalaro nyonyo kopa ki kide.

³Jo akunyo kide me nyonyo tio kede etala i dud lobo kakacol cucucuc, di kiko mono kide tuno kakabor, kiko kunyo gi ki kakacol cucucuc kuno.

⁴Gin kikunyo bure me mono kide me nyonyo di bor kede kakame jo bedo iye, kikunyo gi kakame jo likame beo iye, gin kileedo kede aunoi i bure nogo.

⁵Cam wok ki lobo; do dud lobo piny ineno bala mac olokoloko kiye gi dedede.

⁶Kide mege tie kede sapir,[4] doko apua mere tie kede saabu.

⁷Likame tie winyo moro acamo ringo angeo yongayo nono, doko likame tie wang acut moro kotieko nene.

⁸Leini awakere me obar da pwodi likame olubo yongayo nono; engu da pwodi likame obeo iye.

⁹“Dano kunyo lela atek, doko emuko kide adongo ki dud gi piny.

¹⁰Gin kiroko yote i lela, doko likame tie kidi moro me wel amalo kame kato wang gi.

¹¹Kikunyo kiton tuno kakame icileta cakere kiye; kiko kelo kakaler jamini kalikame oudo neeno.

¹²Do rieko kara kobino udo ki tuai? Doko niang kara tie tuai?

¹³“Jo likame ngeo yongayo aoto iye, doko likame eudere i lobo me jo akuo.

¹⁴Nam me dud lobo waco be, ‘Likame etie buta,’ doko nam me wi lobo da waco be, ‘Likame etie keda.’

¹⁵En likame kokaruno wile kede saabu, doko da likame kokaruno pimo siliba me wile.

¹⁶En likame kokaruno poro wel mere kede saabu me Opir, arabo kede kide me wel, onik amoto sapir.

¹⁷Wel me saabu kede gilasi likame rom kede, doko likame kokaruno sese kede mwolere kame kotimo kede saabu kame kojililo kiber.

¹⁸En wel mere likame kokaruno poro kede me kide me wel, karol arabo kidi amilimili bala akako; wel me rieko kalamo me bira me wel.

¹⁹Kidi topas kame udere Abisinia likame kokaruno poro kede rieko, akadi saabu acil odocon wel mere likame kokaruno poro kede.

²⁰“Kara rieko do wok ki tuai? Doko niang kara tie tuai?

²¹Kokane likame tie wang giakuo moro kame karuno nene, doko koume likame tie winyo moro apor i malo kame karuno nene.

²²Abadon kede to da waco be, ‘Wan owinyo rwonge mere kede yit wa kenekene.’

²³“Rubanga kene en kame ngeo yongayo aoto iye, en engeo kakame rieko bedo iye.

²⁴Piento en wange neno ajikini me lobo, doko en eneno gi dedede kame tie i dud ceng.

²⁵Kakame en emio kede yamo teko, di eko moko rom me pii;

²⁶kakame en eketo kede iswil amako kot, di eko cibo yongayo kame mwoc me kot lubo;

²⁷en di do eko neno rieko, di eko udo bero mere; en engie odocon di eko moke.

²⁸“En di eko waco ne dano be, ‘Ateteni lworo Rwot en rieko; doko pokere kede gikareco en niang.’ ”