Read kumam Yobu 33 Bible Online

Yobu 33 - kumam bible

Yobu 33

¹“Nan do, Okwe Yobu, cik yiti iko winyo yamo nango, doko winy kope dedede kame ayaro waco.

²Neningo, ango do atieko iikere ngamo doga yamo; leba do ocako yamo.

³Kope na nyuto lero me cunya, doko doga yamo kop me ateni.

⁴Tipo ka Rubanga en kocwea, doko wei kame Rubanga Won Twer mio en kame mia kuo.

⁵“Gam doga, ka ikaruno; iik kope ni i yore i yore; ud kacungo ni.

⁶Neningo, i nyim Rubanga ango acal bala in; ango da kikoma kocwea kede lobo.

⁷Kur komi miel pi lwora; ango likame abino dini.

⁸“Ateteni in itieko yamo di oudo ango atie awinyo, doko ango atieko winyo kope kame in iwaco.

⁹In iwaco be, ‘Ango acil, likame tie gikarac moro kame atimo; ango ali kede rac moro akadi atitidi, doko ali kede dub moro i kuo na.

¹⁰Neningo, Rubanga en kame momoo nango kop, en etera bala ngakwor mere;

¹¹etweo tiena kede eriko, doko ebedo ngino yote na dedede.’

¹²“Do i kom kop kame in iwaco, Yobu, in ipoto. Ango ayaro dwoko dogi, Rubanga dwong kalamo jo dedede.

¹³Pinyo kamio in ipiemo kede, di iwaco be, ‘En likame edwoko kope kame ango apenyo’?

¹⁴Pien Rubanga yamo iepone acel, doko eko medo iepone ace, bed bala jo likame niang iye.

¹⁵Iwor di nino omako jo kiber di kitie nino i kabutere gi, Rubanga yamo kede gi i lek kede i gianyuta.

¹⁶En eyabo yit gi, di eko mino gi ikwenyar kame kelo negi lworo,

¹⁷be tetekeny amoto elok gi tenge ki tim gi, di eko lako gi ki ewaka.

¹⁸Rubanga timo manono pi gwoko gi ki ates, en egengo gi ngolo ecilet me to.

¹⁹En ebitaro gi da kede mino gi aramo kame reto gi i apien, doko emio cogere gi mwodo gi nakanaka,

²⁰di cuny gi ko ringo cam, doko emio imue me cam kimiela doko li negi.

²¹Kijony paka ringo me kom gi di likame ko karuno neno; doko cogere gi kalikame lem neno, nan do ko guulo ooko.

²²Kidoko iyapiyapi kede ates, doko kuo gi udo onoko jonek.

²³Aso ka ngatamoro kikom gi tie kede malaika acungo ne, i dierediere mere kede Rubanga, acel kikom imalaikan tutumian, pi nyuto ne gikame epoore timo,

²⁴di en eko bedo kede kisa but dano nono, eko waco be, ‘Lake kur edony piny i ates; ango atieko udo gi me timo cul pi kuo mere;

²⁵mi kome dok nyen bala me eponga; mie edok tek bala i kare kame bin di en pwodi eponga,’

²⁶ka en eko kwano Rubanga, en ebino yei kwac mere; en ebino ot i nyim Rubanga kede ilel, di Rubanga ko dwoke i kuo mere me bedo ngat opoore.

²⁷Dano nono wero i nyim jo di ewaco be, ‘Ango adubo, doko aparao tenge ki gikame oudo poore, do Rubanga likame oko mina alola kame oudo apoore udo.

²⁸En etieko lako kuo na likame abino donyo i ates, do abino meede bedo kuo.’

²⁹“Rubanga ateteni timo gi nogi dedede ne jo; en etimo gi tien atot atota,

³⁰pi lako kuo gi ki ates, tetekeny kibed kede ilel me kuo.

³¹Yobu, cik yiti, winy kop na; lingi, di ango ako yamo.

³²Ka itie kede kop kame imito waco, waca; yami, pien ango abino yei be in ili kede raco moro.

³³Do ka li, lingi di iko winyo kop na, di ango ako bino pwonyi bedo kede rieko.”