Read kumam Yobu 34 Bible Online

Yobu 34 - kumam bible

Yobu 34

¹Eliku oko meede kede yamo mere be,

²“Winyunu kop na, wun cuo ariek, doko mianu yitu, wun jo kame itienu kede ngec;

³pien yit ngeo pokopoko kope bala kame leb bilo kede cam.

⁴Mito wan oyerunu gikame poore; mito wan en kame omokunu ken wa gikame ber.

⁵Pien Yobu otieko waco be, ‘Likame tie gimoro arac kame ango atimo, doko Rubanga otieko kwanyo twero nango;

⁶bed bala ango ayamo kop me ateni, pwodi kowaco be ango angalo; awanon kame komia likame cango, bed bala ango likame atimo gimoro arac.’

⁷Ngai kame cal bala Yobu, ngat kame bwoto kop me acae bala pii,

⁸ngat kame upere kede jo atimo gikareco doko emaro bedo kede jo areco?

⁹Piento en etieko waco be, ‘Likame tie gimoro aber kame dano udo kame ebedo kede kuo ayomo cuny Rubanga.’

¹⁰“Pi mano, winyunu kop na, wun jo kame itienu kede niang, Rubanga likame twero timo gikarac akadi atitidi, Rubanga Won Twer likame romo timo gimoro kalikame poore.

¹¹Piento en ebino culo gi di lubere kede gikame gin kitimo, doko en ebino tero gi iepone kame poore negi kede.

¹²Ateteni Rubanga Won Twer likame romo timo gimoro arac, doko Rubanga Won Twer likame timo gi kalikame tie kakare.

¹³Ngai en kame bin omie twer me lono lobo, ngai en kame bin oketo piny lung i cinge?

¹⁴Ka koto Rubanga di oko kwanyo tipo mere di eko dwoko bute, di eko mino yamo mere kame jo wei kede ocokere bute,

¹⁵jo dedede koto oto kicel, di kiko dok i apua.

¹⁶“Ka in itie kede niang, winy kop noni; winy kop kame ango awaco.

¹⁷Iparo be ngat kame dagi tim me ateni karuno bedo ngapug? Benyo, in ibino waco ne Rubanga ngat kopoore kame tie kede twer be erac,

¹⁸ngat kame waco ne abaka be, ‘In kony ni li!’ kede ne jopug be, ‘Wun jo areco!’;

¹⁹ngat kalikame nyuto apokapoka but jopug, akadi paro pi joabar kalamo jocan, pien gin dedede kibedo tic me cinge?

²⁰Gin kito kitular atular esawa moro kenekene; i dier iwor cing Rubanga dipo jo di kiko to, en eneko wegi twer bala mato pii.

²¹Piento en eciko wange i kom gi dedede kame jo timo, doko eneno kabedere dedede kame gin kioto iye.

²²Likame tie karamoro kame col cucucuc kame jo atimo gikareco karuno pwono iye.

²³Pien Rubanga likame pwodi omoko kare ne dano moro ni pi ot i nyime me wek engol ne kop.

²⁴En ekwanyo wegi twer tenge abongo ngingico tien kop gi, di eko keto jo apat kargi.

²⁵Piento en engeo gikame gin kitimo, en ereto twer gi iwor di manono ko bedo ajikini gi.

²⁶En emio gi alola i nyim jo pi gikareco gi,

²⁷pien gin kitieko lokere tenge kiweko lube, doko likame kiparo pi lubo yongayo mere moro akadi acel.

²⁸Manono oko mino gin kimio koko me jocan otuno bute, di en eko winyo koko me jo kame oudo kotie mino neno can.

²⁹Ka Rubanga obedo gire mot, ngai kame karuno waco be etimo rac? Ka Rubanga okano wange, ngai kame karuno nene? Do en etie kede loc i kom ateker amoto dano moro di rom aroma,

³⁰tetekeny jo kalikame paro pi Rubanga kur bed jopug, arabo kicik ne jo owic.

³¹“Benyo, tie dano moro kotieko waco ne Rubanga be, ‘Ango atieko kanyakino alola, do likame bobo abino medo dubo;

³²nyut na dub na kalikame ango akaruno neno; ka oudo atimo dub moro, likame bobo abino medo time’?

³³In iparo be Rubanga bino timo ne in gikame in imito, be pien in idagi gikame en etimo?

³⁴“Jo atie kede niang, kede jo ariek kame winyo kop na bino waco be,

³⁵‘Yobu yamo atatai abongo ngec moro, kope kame en eyamo rieko li iye atwal.’

³⁶Kite kame oudo cunya mito kede be koto kotamo Yobu kiton i ajikini me teko mere, piento en edwoko kop bala ngatim tim areco.

³⁷En etie medo tim me jemo i wi dub mere; en etie nywaro Rubanga i nyim wa.”