Read kumam Yobu 36 Bible Online

Yobu 36 - kumam bible

Yobu 36

¹Eliku oko meede kede kop mere di ewaco be,

²“Dire kong anonok di ango ako bino nyuto ni, pien ango pwodi atie kede gikame amito waco akaka Rubanga.

³Abino kelo ngec kame awok kede ki kakabor, di ako nyuto be Ngacwec na timo gikame tie kakare.

⁴Pien ateteni kope nango abe li iye; dano kame tie kede ngec koromo en ine atie kedi.

⁵“Ateteni Rubanga tie kede twer, doko en likame ecao ngatamoro; en etie kede teko adwong kede niang.

⁶En likame eweko jo areco meede bedo kuo, do emio jo kame kotidilo bedo kede twero gi.

⁷En likame ekwanyo wange tenge ki kom jo kopoore, do en eketo gin i komini me ajakanuto kede abakai, di eko mino komio gi wor ikar kede ikar.

⁸Do ka kotweo gi kede irikoi di kiko beo i can,

⁹Rubanga nyuto negi tice gi kede gikareco gi, be gin kibedo timo ewaka.

¹⁰En emio yit gi tuc pi winyo pwony mere, di eko ciko gi be kiwek timo gikareco.

¹¹Ka gin kiko winyo kop mere, di kiko donyo tic ne, gin kitieko kare me kuo gi di kitie kede kuo aber, kibedo kede kuo me yomcuny.

¹²Do ka gin kiko dagi winyo kop na, kibino to pi kwina piny, kobino neko gi kede epima.

¹³“Jo kalikame paro pi Rubanga mako lilo i cuny gi; ka en etweo gi, gin likame kikok bute pi konyo gi.

¹⁴Gin kito di pwodi kititino, doko kuo gi jik kede lewic.

¹⁵Jo kame tie neno can Rubanga tio kede can gi nono me lako gi; en etio kede can opoto i kom gi nono me yabo wang gi.

¹⁶“En emito kwanyi ki peko di eko teri kakalac, kalikame tie gimoro kame dii kiye; en ebino pongo wi emesa ni kede cam abeco.

¹⁷Do nataman in itie udo alola kame poore kedi; kotieko ngolo ni kop kede ateni.

¹⁸Gwokere kur dano moro bitao in kede abar, doko kur iyei giamia kame komio i pipiny lok cunyi.

¹⁹Iparo be koko nin karuno konyi ki peko, arabo teko dedede kame in itie kede?

²⁰Kur ibed paro tuno me iwor, en kare kame komuducaro kede atekerin.

²¹Gwokere kur ilokere timo dub; pien kotie tami kede can pi neno ka ibino dubo.

²²“Neningo, twer ka Rubanga dwong; apwony mene kame cal bala en?

²³Ngai kotieko nyuto ne gikame epoore timo, amoto ngai kame karuno waco be, ‘In itimo gikarac’?

²⁴Yutuno pake pi tice mege, tice kame jo obedo wero were me pake pirgi.

²⁵Jo dedede otieko neno gikame en etimo; do gin kineno ki tenge kakabor.

²⁶Ateteni Rubanga dwong kalamo niang wan; wan likame okaruno maro mwakini mege.

²⁷“Pien Rubanga mio pii duny eoto malo, di eko loke edoko kot;

²⁸en emio idoun cwei kot, en ecwei di etot ne jo dedede.

²⁹Iparo be tie dano moro kame karuno ngeno epone kame idoun petere kede i malo, amoto epone kame kot mwoc kede i malo kakame Rubanga bedo iye?

³⁰Neningo, en esarakino meny mere rimaro en, di asara mere ko romo kiton dud nam.

³¹Manono en epone kame en epito kede jo; en emio cam bedo tot negi.

³²En emako epie kede cinge di eko cike pi gweno kakame en emito kikokome.

³³Mwoc me kot nyuto bino me yamo ager, akadi doke da ko ngeno be etie bino.