Read kumam Yobu 37 Bible Online

Yobu 37 - kumam bible

Yobu 37

¹“Yamo abuko nono mio cunya poto, emio cunya dipere kitek.

²Winyunu kong kite kame dwan Rubanga mor kede, winyunu gato me kop awok ki doge.

³En emio meny me kot romo malo dedede, di eko caro wi lobo lung.

⁴Di do dwane ko dorano; en edorano kede dwane me dwongo mere, doko en likame egengo meny me kot esawa kame dwane dorano kede.

⁵Dwan Rubanga mor mor me aura; en etimo jamini adongodongo kalikame wan okarununu niang iye.

⁶Piento en etwero ciko akako be, ‘Cwei i lobo’; doko en etwero ciko kot da be, ‘Pot di itot i lobo.’

⁷En emio tice me jo dedede cungo tetekeny jo dedede kame en ecweo ngei tice mege.

⁸Di do leini ko ot kapwono gi, kiko dong kakame kibuto iye.

⁹Apipiru wokun ki tetu piny, doko yamo kawok ki tetu malo ko kelo ngico atek.

¹⁰Wei ka Rubanga mio pii makakin doko akako, di pii me nam ko arumakin.

¹¹En emio pii cokere i idoun di kiko doko pek; idoun nogo ko sarakino meny mere.

¹²Gin kiwire ot bala kame Rubanga mio gi, di kiko cobo gi dedede kame en eciko negi timo i wi lobo lung kakame jo bedo iye.

¹³En etimo manono pi mino jo alola, arabo pi timo bero ne lobo, amoto pi nyuto amara mere.

¹⁴“Winy kope nogi, Okwe in Yobu; mak ber asisa di iko paro kop i kom tice me aura kame Rubanga timo.

¹⁵Benyo, in ingeo epone kame Rubanga mio kede cik, di eko mino kot meny i edou mere?

¹⁶Benyo, in ingeo epone kame idoun ledo kede i malo, tice me aura me ngat katie kede ngec timo?

¹⁷In ngat kame igoen ni liet i kare kame yamo me tetu piny buko kede di eko mino piny ling titi,

¹⁸iparo be in ikaruno peto idoun bala en, di iko mino gi kidoko tek bala nyonyo kame kotwako?

¹⁹Pwony wan kong gikame obino waco ne; likame tie kop kame wan okaruno iiko me pido pien likame tie gikame wan ongeo.

²⁰Ango likame abino kwano kare me yamo kede Rubanga; benyo, tie ngatamoro kame cunye otieko mito be koto koneke?

²¹“Likame tie ngat kayei ciko wange neno wang ceng di etie rieny i malo, kame yamo otieko tero idoun tenge.

²²Meny acil bala saabu tie tetu malo; angosibib ka Rubanga kelo ne wa lworo.

²³Wan likame otwerunu tuno but Rubanga Won Twer; en etie kede twer adwong doko etimo jame dedede kakare, en etimo gi dedede kakare mio likame etero jo kirac.

²⁴Pi mano, jo lwore; en likame eparo pi jo kame terere ken gi be kiriek.”