Read kumam Yobu 38 Bible Online

Yobu 38 - kumam bible

Yobu 38

¹Di do Rwot oko dwoko dog Yobu i apipiru di epenye be,

²“In ngai kame imito be igalao iik na kede kope nin me kwina piny?

³Aso cungi di itieko iikere, ango ayaro penyi di iko dwoko na.

⁴“I kare kame ango aketo kede acakini me lobo, oudo in itie tuai? Waca, ka ida cabo itie kede niang.

⁵Ngai en komoko rom mere, ka ateteni in ingeo? Ngai en korieo tol me pime?

⁶Ipirin agange cungo i kom nyo? Arabo ngai kame bin ocibo kide mege me esonda,

⁷di acerin me odiko wero karacel doko di imalaikan lelemo kede kilel?

⁸Ngai en kame bin ocego nam pi gengo pii i kare kame bin pii obelo kede bala opuyo?

⁹I kare nono ngai en kame bin ako mino idoun obedo bala igoen me ume, kede colpiny acucucuc oko bedo bala igoen me bone?

¹⁰Ango en kame bin agiro ne ikor, di ako cego ikekon mege kede lilime.

¹¹Ango en kame bin awaco ne be, ‘Ibino bino iko jik kan, do likame iko kalamo en, doko ebuka ni atingere kitek da bino cungo kanoni.’

¹²Benyo, cako nywali tie ceng moro acel kame in itieko ciko kede odiko pi en timo tic mere, doko iko mino obai ongeo kabedo mere?

¹³Benyo, in itieko ciko obai pi yabere romo lobo lung, di eko mino jo areco tengere ot pwono?

¹⁴Ru me piny mio imukuran kede aditoto atie i piny neno kakaler bala egoe korurujun, di kinyutere kiber bala agirat kame kotimo i kor agulu.

¹⁵Ru me piny twono jo areco lero gi, di oko tieko tim gi me gero.

¹⁶“Benyo, in itieko donyo i wen pii me nam, arabo itieko ot kede tieni i dud nam?

¹⁷Benyo, kotieko nyuto ni irutei me to, arabo itieko neno irutei acego kabedo me jo oto?

¹⁸Iparo be in ingeo rom me wi lobo lung? Tuc na ka in ingeo gi nogi dedede.

¹⁹“Benyo, in ingeo yongayo aoto kakame lero wok kiye, arabo colpiny wok ki tuai,

²⁰me wek iter gi katice gi, arabo itwer nyuto negi yote kame dwoko gi kabedere gi?

²¹Ateteni in ingeo, pien oudo kotieko nywali i kare nono, doko mwakini me dongo ni tot twatwal.

²²“Benyo, in itieko donyo i ude kame ango akano iye pii korurano, arabo itieko neno ot me kano akako?

²³Ango akano gin pi kuro kare me peko, pi kuro kare me yi.

²⁴Benyo, in ingeo yongayo aoto kakame meny me kot wok kiye, arabo kakame kosarakino kiye yamo me tetu kide i wi lobo?

²⁵“Ngai en koyeco puleju kame kot bwote ki malo di lubo, kede yongayo kame mwoc me kot lubo?

²⁶Ngai kamio kot cwei kakame jo likame bedo iye, i wi tim kakame dano moro li kiye?

²⁷Ngai kamio kot cwei romo lobo kotuo agimoro li kiye tetekeny lum tui iye?

²⁸Benyo, papa me kot tie, arabo ngai en konywalo toyo?

²⁹Ngai en kobedo toto me akako, doko ngai en konywalo ekuna?

³⁰Pii lokere eko doko tek bala kidi, di wi nam ko arumakin.

³¹“Iparo be in ikaruno tweno karacel acerin kocokere malo, arabo itwero gonyo tol kotweo karacel acerin kocokere me tetu malo?

³²Iparo be in itwero mino acerin neeno i kare kame miero gin kibed tie kede, arabo itwero nyuto ne acer adwong me tetu malo kede atitino mege yongayo gi?

³³Benyo, in ingeo iswilia kame kopugo kede malo? Iparo be itwero tic kede gi me pugo lobo da?

³⁴“Benyo, in itwero lelemo di iko ciko idoun, me wek gin kibololo kot i komi?

³⁵Iparo be in itwero ciko kot pi meny, di en eko waco ni be, ‘Ango ine aikere pi timo ni tic’?

³⁶Ngai en kamio arumpiny rieko me ngeno dwogo me kot? Arabo ngai en kamio tongweno niang ru me piny?

³⁷Ngai atie kede rieko koromo, kame twero maro wel me idoun? Arabo ngai katwero lengo agune me malo di eko onyo kot piny,

³⁸di eko mino apua doko cwoto, doko eko makakin edoko tek?

³⁹“Benyo, in itwero dwaro ne engu le me acama, arabo ikaruno mino idwe me engu yeng

⁴⁰di gin kitie kidole kabuto gi, amoto di kitie buto kapwono gi di kikio le me acama?

⁴¹Ngai kamio agak cam, ka idwe mege kok but Rubanga, di kiwiratoi pien cam li negi?