Read kumam Yobu 41 Bible Online

Yobu 41 - kumam bible

Yobu 41

¹“Iparo be in itwero wano Lebiatan kede golu, arabo itwero tweno lebe kede tol?

²Iparo be in itwero rwako auno iume, arabo itwero tuco itinyo mere kede golu?

³Iparo be en ebino ngangao in pi weke? Iparo be en ebino yamo kedi di emwolere?

⁴Iparo be en ebino timo kedi isikan pi in tere bala ngatic nin atwal?

⁵Iparo be in ibino tuko kede bala winyo, arabo ibino twene i tol bala gi me anena akelo ne anyira ni yomcuny?

⁶Iparo be jocik deknam bino patano i kome? Iparo be jocat deknam bino popoko en me acata?

⁷Benyo, in ikaruno tutuco del mere kede tong dobo, arabo itwero tuco wie kede macarin?

⁸Tam kong mule; wi likame bino wil kede yi nono, doko likame ibino rucakino.

⁹Gen me make likame tie; dano nene anena aman di teko ko tiek i kome di eko poto piny.

¹⁰Likame tie dano moro acunye nwang kame yei kanyakino twaruno en. Ngai karuno cungo i nyime?

¹¹Ngai karuno sure di eko bwot abongo udo peko? Ngai, i wi lobo lung?

¹²“Ango likame ayaro ling i kom kop amako tiene, arabo i kom kop amako dwongo me teko mere, amoto bero me epone kame kocwee kede.

¹³Ngai twero gonyo giangapa mere me ooko? Ngai twero tuco ekoti mere kame edokakino pi gwoko kome?

¹⁴Ngai twero yabo doge? Lake mio jo lworo.

¹⁵Abokoya me ngee ineno bala ibukui kame konapo i irotin, kimakakin ineno bala komwono gi amwona.

¹⁶Kitie dicidici karacel, akadi yamo da likame twero bedo tie i diere gi.

¹⁷Gin kiriamakin, acel oriamakin kede ocelu; kikokodun doko likame kokaruno poko gi.

¹⁸Ka en egiro, lau awok ki doge rieny, doko wange rieny bala ceng apwodi tie wok awoka odiko.

¹⁹Leb mac liel wok ki doge; mac kire ooko ki doge.

²⁰Iiro duny wok ki ume, bala eura aduny ki agulu kodop me tedo.

²¹Eura me wei mere moko akuk; leb mac liel wok ki doge.

²²Ngute tek twatwal, mio jo dedede ariamo kede teko gi tiek pitipit pi lworo.

²³Kakododolun me kome oriamakin; kimakakin likame kiyangere.

²⁴Cunye tek bala engaro, etek bala kidi me riego.

²⁵Kame ekiar, akadi jo atek da doko lwor; kidok cen pi lworo.

²⁶Akadi epima cobe, likame epima timo ne gimoro, akadi tong, emal arabo macar.

²⁷Kibute, lilim cal bala arienge, doko nyonyo buronsi cal bala yat kotop.

²⁸En likame eringo emal; kibute, engaro kame koporosaro i kome cal bala cucung.

²⁹En eneno akuta bala arienge; en enyero macar kame kolate kede anyera.

³⁰Abokoya me yie cal bala abalatigo abitobito; etimo eos mere i cwoto ineno bala me ebao me canyo.[5]

³¹En emio pii me nam gugunyo bala pii kame kotie cwako kede agulu, emie egugunyo bala mo kame kotie cwako.

³²Eweko eos ameny kakame ebeo iye; emio nam kuao buo atar bala lwar.

³³Likame tie gimoro karom kede i wi lobo, en ebedo giacwea kalikame tie kede lworo.

³⁴En eneno kede acae leini dedede kawakere; en ebedo abaka kame lo gi dedede kawakere.”