Read kumam Yobu 42 Bible Online

Yobu 42 - kumam bible

Yobu 42

¹Di do Yobu oko dwoko dog Rwot be,

²“Ango angeo be in ikaruno timo gi dedede, doko da gikame in i iiko pi timo likame kotwero gengo.

³In ipenyere be, ‘Ngai ine kame totolo iik na di eli kede ngec?’ Ateteni ango oudo ayamo gi kalikame aniang iye, jamini me aura twatwal kibuta, gi kalikame oudo angeo.

⁴Cik yiti iwinyi, ango ayaro yamo; ayaro penyi di in iko dwoko na.

⁵Ango oudo awinyo kop i komi awinya, do nataman atieko neni kede wanga.

⁶Manono omio lewic omaka, doko abedo i apua kede i buru pi nyuto swilaro na.”

⁷Ingei Rwot waco ne Yobu kope nogi, eko waco ne Elipasi dano me bomba me Tema be, “Ango alilo ne in kede jowoti are go, pien wun likame ikounu yamo kop apoore i koma bala kame ngatic na Yobu otimo.

⁸Pi mano, nataman kwanyunu twonin kanyaare kede romini kanyaare ikounu tero gi but ngatic na Yobu, di ikounu mino gi bala giayala awanga piru. Yobu bino lego piru di ango ako bino gamo kwac mere di likame ako timo ne wu bala kame mitere ne wu. Pien wun likame ikounu yamo kop apoore i koma bala kame ngatic na Yobu otimo.”

⁹Aso, Elipasi dano me Tema, kede Bildad dano me Sua kede Sopar me Naama oko ot di kiko timo gikame Rwot oudo owaco negi, di Rwot oko gamo ilega ka Yobu.

¹⁰Di do kakame Yobu otieko lego ne kede jowote, Rwot oko dwoko ne lonyo mere. Rwot omie jamini adoko me agege tien are.

¹¹Di imiegu kede amiegu mege dedede oko bino karacel kede jo koudo ngee sek, kiko camo kede en ebaga i ode. Gin kiko nyuto ne cuny me kisa di kikweo cunye pi can dedede kame Rwot omio opoto ne. Ngat acelacel kikom gi oko mine sente moro kede epeta kame kotimo kede saabu.

¹²Rwot oko mino Yobu winyo i kare me atiekini me kuo mere kalamo i kare me agege. Yobu bin oko bedo tie kede romini tutumia tomon kiwie ongwon (14,000), aguraguran tutumia kanyape (6,000), twonin me pur tutumia are (2,000), kede pundan tutumia acel (1,000).

¹³En eko bobo nywalo awobe kanyaare kede anyira adek.

¹⁴Eko cako nying nyako me agege Jemima, me are Kesia, kede me adek Keren Kapuk.

¹⁵I wi lobo lung likame oudo tie mon acil bala anyira ka Yobu. Papa gi bin oko mino gi kinywako sikao jamini mege karacel kede imiegu gi.

¹⁶Ingei manoni, Yobu bin oko bedo kuo pi mwakini tol acel kede ot ongwon (140), di eko neno ikwae kede idwe me ikwae mege, kiton tuno i ikwae me ongwon.

¹⁷Yobu bin oko to di etieko ti kiber.