Read kumam Yobu 5 Bible Online

Yobu 5 - kumam bible

Yobu 5

¹Yobu, lwongere nan di iko neno ka ngatamoro oyaro gamo dogi. Malaika mene en kame in iyaro ot bute?

²Ateteni cuny me ngoi neko jomingo, nyeko da neko jo akwia piny.

³Ango atieko neno jomingo atie kiber, do cucuto ango ako lamo miere gi.

⁴Idwe gi likame bedo kede mulem; nakanaka kongolo kop lo gi i ekiko me erute me bomba, di likame ngatamoro ko konyo gi.

⁵Jo akec oneko camo cam kame jomingo opuro, gin kikwanyo kiton cam atie i dier okuto; joeranga da mwanao jame gi.

⁶Pien can likame wok ki lobo, arabo peko likame tui ki piny;

⁷Do konywalo jo anywala i peko, bala kame ateteni mac kire kede malo.

⁸“Koto di oudo ango inonono, koto amo kakame Rubanga tie iye, koto atero koko na bute.

⁹En nakanaka etimo jamini adongodongo kalikame niangere, en etimo jamini me aura kalikame marere.

¹⁰En nakanaka emio kot cwei i wi lobo, eko cwano pii i poti;

¹¹jo me ruom apiny en etingo gi i kabedo amalo, kede jo kame tururo en emio gi kuo aber.

¹²En etotolo iik me jongolrieko, tetekeny gikame kitimo kur cobere kakare.

¹³En emio jongolrieko moko i owic me rieko gi, doko da en esusunyo jiko iik gi.

¹⁴Gin piny doko col negi iceng, di kiko donyo tiamtiama i dier iceng ineno bala iwor.

¹⁵Do en elako jo kame piny oloo ki to, elako gi ki cing jo atek.

¹⁶Manono mio jocan bedo tie kede gen, di oko mino tim areco jik.

¹⁷“Etie kede yomcuny ngat kame Rubanga bitaro; pi manono, kame Won Twer obitaro in kur ibed kede acae iye.

¹⁸Pien Rubanga mio dano apore, do en eko tweno apore nono; en ejuto dano, do cinge ko cange.

¹⁹Rubanga bino laki ki peko, en ebino laki tien kede tien ki peko ni.

²⁰I kare me kec en ebino gwoki likame ibino to kec, i kare me yi en ebino gwoki likame koneki.

²¹Rubanga bino laki ki kope areco me jo yamo i komi, doko likame ibino bedo kede lworo ka can moro ongoole.

²²In ibino nyero kame can moro amoto kec opoto, doko likame ibino lworo leini me obar.

²³Pien poto kame in ibino puro likame bino bedo tie kede kide, doko da leini ager me obar likame bino suri.

²⁴Di do in iko bino ngeno kiber be mulem tie i eema nin; kame ingingico romini ni, ibino udo be gin dedede kitie kiber.

²⁵Ibino bedo tie kede ikwae atot, jo konyai kibuti bino bedo tot bala lum.

²⁶Ibino to di itieko ti kiber, bala kame wit kal cek kede i poto di oko tere i diakal me pieto ka kare mere oromo.

²⁷Neningo, wan otieko mono ateni me kop noni; etie kop me ateteni; aso winye iko game.”