Read kumam Yobu 8 Bible Online

Yobu 8 - kumam bible

Yobu 8

¹Bildad dano me Sua oko dwoko be,

²“Iyaro tero kare arom amene yamo kope nogi, kope ni acal bala yamo abuko kitek nogo?

³Mam Rubanga ngolo kop i ateni? Doko da mam Won Twer timo gikame tie kakare?

⁴Ka idwe ni oudo odubo bute, en do etieko mino gi alola di lubere kede gikareco gi.

⁵Do ka nan in ilokere but Rubanga di iko cwano kwac ni but Won Twer,

⁶ka in ibedo ngat acunye cil di ipoore, ateteni Rubanga bino konyi di eko bino dwoki i cal kame ngoce itie iye.

⁷Gikame ngoce itie kede oudo nonok ka koporo gi kede gikame ibino udo i anyim.

⁸“Ber kong pepenyo kop i kom lwak me kare kokato di iko bino udo gikame joakwari wa bin osiyao;

⁹pien wan obedo idwe me nyoronyoro ni, doko likame ongeo gimoro; ceng me kuo wa i wi lobo cal bala tipo me yat.

¹⁰Gin kibino pwonyi rieko kame gin kiudo; kibino waco ni kope me niang atut kame gin kitie kede.

¹¹Benyo, aladoi twero dongo kakame osamai li kiye? Arabo bilo twero dongo kakame pii li kiye?

¹²Ka pii li, gin kisunyo tuo kalamo yen dedede di udo pwodi kititino likame kiromo atonga.

¹³Magonogi en gikame timere ne jo kalikame paro pi Rubanga; gen me jo kalikame paro pi Rubanga bino doko li.

¹⁴Gen gi cal acala bala ausi ayoyom, gikame kiketo iye cuny gi pirisar bala bwoi me otiemotiem.

¹⁵Ka dano ogongere i bwoi me otiemotiem nono, en ecocotun; ka dano omake, likame doko edong di etie.

¹⁶“Jo areco cal bala giapita kame dongo libaliba di pwodi ceng li, di kiko lot kiumo poto.

¹⁷Aliasin gi ko dwadwalun i kom ingaroi, di kiko moko i kom kide.

¹⁸Ka koputo gi ki kargi, kargi nono bino kwina gi di ewaco be, ‘Ango pwodi gira likame aneno wu.’

¹⁹Manoni en akodi yomcuny me jo areco tie kede; jo areco ace pwodi bino di lunyo wang gi.

²⁰“Do neningo, likame Rubanga bino dagi dano ali kede raco moro, doko da likame ebino konyo jo areco.

²¹En ebino mini inyero bobo, di iko ilelem kede kilel.

²²Rubanga bino mino lewic mako jo adagi, di eko bino dudubo miere me jo areco.”