Read kumam Sabuli 101 Bible Online

Sabuli 101 - kumam bible

Sabuli 101

¹Abino wero wer kame mako amara kame genere kede ngolo kop i ateni; abino were butin, Okwe Rwot.

²Abino bedo abongo raco moro i kuo na; awene en kame in ibino bino kede buta? Abino bedo kede cuny aber i oda,

³doko likame abino yei gimoro arac. Cunya dagi tice me jo apoto tenge kibut Rubanga; likame abino bedo tie kede akadi acel moro da.

⁴Cuny kayei timo raco akaa bino bedo bor keda; likame abino timo gimoro arac.

⁵Ango abino muducaro dano moro kame dubo nying ngakio mere i mung. Likame ango abino yei kanyo ikiteso me dano moro kame wakere kede kame deng.

⁶Abino neno kede kisa jo kame bedo i lobo noni di kigenere, tetekeny kibin kibed keda; ngat kame bedo abongo raco moro i kuo mere bino tic nango.

⁷Likame tie ngatamoro kame tie kede angalo kame bino dong i oda; likame tie ngat kame yamo kope me abe kame bino dong i nyima.

⁸Odiko acelacel abino muducaro jo atimo tim areco dedede kame tie i lobo noni; abino riamo tenge jo atimo tim areco dedede ki bomba ka Rwot.