Read kumam Sabuli 107 Bible Online

Sabuli 107 - kumam bible

Sabuli 107

¹Okwe, miunu Rwot pwoc piento en eber; pien amara mere kalikame lokere bedo nakanaka.

²Poore jo kame Rwot olako wac kamanono, jo kame en lako ki peko,

³kede kame ecoko ki lobere apat, ki tetu kide kede ki tetu tim, ki tetu malo kede ki tetu piny.

⁴Mogo kikom gi oudo obedo irim i wi tim abongo udo yongayo moro kame tero gi i bomba kame jo bedo iye.

⁵Kec kede orio oudo oneko gi, omio cuny gi oko bedo abongo gen dedede.

⁶Di do gin kiko kok but Rwot i kare kame oudo kitie kede i peko, di en eko lako gi ki can gi.

⁷En etelo gi lubo yongayo koriere, paka gin tuno i bomba kame jo bedo iye.

⁸Poore kipwoi Rwot pi amara mere kalikame lokere, pi tice mege me aura kame etimo ne jo.

⁹Piento en eneko orio me jo kame orio oneko, kede jo kame kec oneko en emio gi kiyeng kede jamini abeco.

¹⁰Mogo kikom gi oudo obedo kakacol cucucuc, di gin mabus kame tie neno can di kotweo gi kede irikoi,

¹¹pien gin oudo kijemo kidagi winyo kop ka Rubanga, di kiko dagi gamo tam ka Ngamalo Twal.

¹²Gin oudo kiol pi tic atek; ka oudo kipopoto piny likame oudo tie ngat kame konyo gi.

¹³Di do gin kiko kok but Rwot i kare kame oudo kitie kede i peko, di en eko lako gi ki can gi;

¹⁴en ewoto gi ki kakacol cucucuc, eko cocoto irikoi kame oudo kotweo gi kede.

¹⁵Poore kipwoi Rwot pi amara mere kalikame lokere, pi tice mege me aura kame etimo ne jo.

¹⁶Piento en etuturo ikekon kame kotimo kede nyonyo buronsi, eko ngwekakino nyonyo ayon doko adulion are.

¹⁷Jo mogo kikom gi oudo obedo jomingo pi tim gi areco, di kiko beo i can pi dub gi.

¹⁸Gin kibedo kwero egere dedede me cam, omio kiko noko erute me to.

¹⁹Di do gin kiko kok but Rwot i kare kame oudo kitie kede i peko, di en eko lako gi ki can gi;

²⁰Rwot oko yamo kop di gin kiko cango, di eko lako gi ki to.

²¹Poore kipwoi Rwot pi amara mere kalikame lokere, pi tice mege me aura kame etimo ne jo.

²²Doko poore kimi giayala me pwoc, di kiko tatamo tice mege kede were me yomcuny.

²³Mogo ooto kede emeri i nam adwong, jo kame oudo timo tic i pii atut pi udo epone me kuo.

²⁴Gin kineno tice ka Rwot, kineno tice mege me aura i nam.

²⁵Piento en ewaco dwane di yamo atek oko cako buko, di eko cwano ebuka i nam.

²⁶Ebuka oko tingo gi kede emeri tuno malo i wi yamo, doko eko dwoko gi paka piny i dud nam; gin likame kiko twero dino cuny gi i can gi nono.

²⁷Wi gi oko donyo wirato gi di kigete bala jo omer, di wi gi oko cungo likame kingeo gi me atima.

²⁸Di do gin kiko kok but Rwot i kare kame oudo kitie kede i peko, di en eko lako gi ki can gi;

²⁹En emio yamo kame oudo tie buko i nam okwei, di ebuka me nam oko ling.

³⁰Di do gin kiko bedo kede yomcuny pien nam oudo okwei, di en eko tero gi paka i edoket kame gin oudo kitie mito ot iye.

³¹Poore gin kipwoi Rwot pi amara mere kalikame lokere, pi tice mege me aura kame etimo ne jo.

³²Poore kimie dwongo i diere me jo mege kocokere, doko kipake i cokere me joadongo.

³³En oudo eloko icileta odoko wi tim, kede ataneko odoko kakotuo;

³⁴eloko lobo amio odoko lobo amunyomunyo, etimere kamanoni pi raco me jo kame bedo i lobo nono.

³⁵En eloko wi tim odoko atapar, doko eloko lobo kotuo odoko ataneko me pii.

³⁶En eko mino jo kame kec oneko obedo kuo, di kiko gero bomba kame kibedo iye.

³⁷Gin kiko cuno kodi, doko kipuro poti me olok, kodere oko cek kiber.

³⁸Wel gi oko nyai pien Rwot omio gi winyo, doko likame eko yei ne wel me doke gi dwogo piny.

³⁹I kare kame komio wel gi odok kede piny, di kiko doko goro pi adiadia, peko kede cwercuny,

⁴⁰Rwot oko kelo acae i kom abakai gi, di eko mino gi irim i wi tim kame li kede yote;

⁴¹do en eko woto jocan ki peko gi, di eko mino jo me ude gi onyai bala romini.

⁴²Jo opoore neno man di kiko bedo kede yomcuny, do jo areco neno di likame kiko twero yamo gimoro.

⁴³Poore jo ariek ket tam gi i kom gi nogi, di kiko paro pi amara kalikame lokere ka Rwot.