Read kumam Sabuli 109 Bible Online

Sabuli 109 - kumam bible

Sabuli 109

¹Kur ilingi alinga, Okwe Rubanga kame ango apako.

²Pien jo areco kede joangalo tie yamo kirac i koma, leb gi tie yamo kope areco me abe i koma.

³Kilukaro ango kede kope me adagadaga, doko kisura kede kope areco abongo tien kop moro.

⁴Gin kiwaco be ango arac bed bala ango amaro gi, kom akadi di atie lego pirgi da.

⁵Aso gin kiculo bero nango kede raco, doko da kiculo amara nango kede adagadaga.

⁶Gin kiwaco be, “Yer ngat arac en kame pid kede, poore ngat kame pide cungi i bade tetu cam.”

⁷Kame kopide poore tur raco i wie, doko da poore ter ilega mere bala dub.

⁸Mi ceng me kuo mere bed nonok, doko poore ngatamoro luny tic mere.

⁹Mi idwe mege dok idwe kic, kede dako mere dok apuserut.

¹⁰Mi idwe mege bed jorim piny di kikwao jamini akwa; mi koriam gi tenge ki ameje kame kibedo iye.

¹¹Mi ngat kame oudo okope lim mak jamini dedede kame en etie kede, mi jokumbor yak jamini kame en eudo kede kwok mere.

¹²Kur imi ngatamoro bed tie kame bino nyuto ne mwolo, doko da kur ngatamoro bed tie kame bino bedo kede kisa but idwe kic kame en eweko.

¹³Mi ikwae mege dedede totoun, doko da mi nyinge rwenyi atwal atwala kibut lwak me kare me anyim.

¹⁴Akwao Rwot pi yutuno dub me joakwari mege, doko da kur esasiro dub ka toto mere akadi acel.

¹⁵Akwao be Rwot bed yutuno dub gi nakanaka, doko poore wi jo me wi lobo wil kede gi atwal atwala.

¹⁶Piento en likame bin eyutuno pi timo mwolo, do en ebedo tidilo paka neko jocan, jo kame piny oloo kede jo kame par opong i cuny gi.

¹⁷En oudo emaro lamo jo; poore nan ilam bin i wi eda. En oudo likame emaro kwano ne jo winyo; poore nan winyo bed bor kede eda.

¹⁸Ilam oudo tie bala ekoti kame en engapo ceng dedede, mi ilam mere nono nyonyongo kome bala pii, kede kibid cogere mege bala mo.

¹⁹Miero ebed bala egoe kame en erwao i kome, bala rakoba kame en engapo ceng dedede.

²⁰Akwao be manono bed cul kame Rwot mi jo kame waco na raco, jo kame yamo kirac i kom kuo na.

²¹Do in, Okwe Rwot Rubanga na, yi pira pi gwoko nyingi; doko laka pi bero me amara nin kalikame lokere.

²²Pien ango angacan doko piny oloa; atie kede cwercuny i kuo na.

²³Kuo na do tie ot i rwenyo bala tipo me yat kame rwenyo otieno; acal bala obonyo kame kotie lalako tenge.

²⁴Conga do onyonyongun pi kanyo kec; koma do otieko ner.

²⁵Ango do atieko doko gi me anyera but jo awaco na raco; ka kinena, kiyayango wi gi ayayang.

²⁶Konya, Okwe Rwot Rubanga na! Laka di lubere kede amara nin kalikame lokere.

²⁷Mi gi kingei be cingi inononi kolaka; Okwe Rwot, in en kame itimo manoni.

²⁸Wek gin kilama, do in mia winyo; mi lewic mak jo kame timo nango kolo; mi ngatic ni bed kede yomcuny.

²⁹Mi jo kame waco na raco ngapere kede lewic; mi gi kiboore kede lewic bala egoe kame korwao.

³⁰Doga bino mino Rwot pwoc adwong; abino pake i diere me jo kocokere,

³¹piento en ecungo i bad tetu cam me jo kame piny oloo, pi lako gi ki cing jo kame ngolo negi kop me to.