Read kumam Sabuli 115 Bible Online

Sabuli 115 - kumam bible

Sabuli 115

¹Likame but wan, Okwe Rwot, likame but wan, do in en kame miero deyo bed buti, pi amara ni kalikame lokere kede pi genere ni.

²Pinyo kame mio atekerin apat waco ne wan be, “Rubanga wu kara tie tuai?”

³Rubanga wan tie i malo; en etimo gikame cunye mito.

⁴Caljwogi gin kotimo kede siliba kede saabu, gin tic me cing dano.

⁵Gin kitie kede dog gi, do likame kikaruno yamo; kitie kede wang gi, do likame kikaruno neno piny.

⁶Gin kitie kede yit gi, do likame kikaruno winyo kop; kitie kede um gi, do likame kikaruno ngweno gimoro.

⁷Gin kitie kede cing gi, do likame kikaruno mulo gimoro; kitie kede tien gi, do likame kikaruno ot; likame tie mor moro kame dwan gi timo.

⁸Jo kame timo gi cal acala kede gi; jo kame keto gen i kom gi da cal kamanono.

⁹Okwe wun jo me Isirael, genunu Rwot! En ngakony wu, doko en ebuku wu.

¹⁰Okwe wun jo me ot ka Aaron, genunu Rwot! En ngakony wu, doko en ebuku wu.

¹¹Wun jo kame lworo Rwot, genenu! En ngakony wu, doko en ebuku wu.

¹²Rwot obedo paro pirwa; en ebino mino wa winyo; en ebino mino winyo but jo me Isirael; ebino da mino winyo but jo me ot ka Aaron;

¹³en ebino mino winyo but jo kame lwore, ebino mino winyo but jo me ruom apiny kede da but jo me ruom amalo.

¹⁴Akwao Rwot emi wu inywalunu di wel wu ko meede, wun karacel kede idwe wu.

¹⁵Akwao Rwot emi wu winyo, en ngat kame ecweo malo kede piny.

¹⁶Malo obedo me ka Rwot, do lobo en etieko mino but jo.

¹⁷Jo kotieko to likame pako Rwot, akadi jo kame donyo piny i kabedo kame oling kiye alinga.

¹⁸Do wan jo kame okuo obinunu pwono Rwot, cako nataman tuno ikar kede ikar. Pak bed but Rwot!