Read kumam Sabuli 119 Bible Online

Sabuli 119 - kumam bible

Sabuli 119

¹Kitie kede yomcuny gin jo kame kili kede raco moro i kuo gi, jo kame lubo iswil ka Rwot.

²Kitie kede yomcuny jo kame gwoko cik mege, jo kame moe kede cuny gi lung,

³gin kibedo jo kalikame timo gimoro arac, do kilubo yote mege.

⁴In itieko mino wan cik nin be ogwok gi kiber.

⁵Okwe koto abedo ngat kame genere i lubo iswilia ni!

⁶Ka ango aketo cunya lubo cik nin dedede, lewic likame bino maka.

⁷Ango abino paki kede cuny aber, kame atie pwonyere i kom iswilia nin kopoore.

⁸Ango abino lubo iswilia nin; kur ijala atwal atwala.

⁹Epone mene kame dano apwodi dongo adonga karuno gwoko kede kuo mere pi bedo di cil? Ekaruno timo kamanono ka en egwoko kuo mere bala kame cik nin mito.

¹⁰Ango amoi kede cunya lung; kur iweka aparao tenge ki lubo cik nin.

¹¹Ango akano kop nin i cunya tetekeny kur atim dub buti.

¹²Pak bed buti, Okwe Rwot; pwonya iswilia ni.

¹³Abino tatamo cik dedede kame in imio.

¹⁴Ango cunya yom pi lubo cik nin kalamo yomcuny me abar dedede.

¹⁵Abino bedo paro cik nin i cunya, di ako keto cunya lubo yote nin.

¹⁶Ango cunya bino bedo yom i lubo iswilia ni; likame wia bino wil kede kope ni.

¹⁷Tim bero ne ngatic ni, tetekeny ameede bedo kuo di ako lubo kope nin.

¹⁸Yab wanga tetekeny anen jamini me aura kame tie i iswil nin.

¹⁹Ango atie bedo i piny kan bala welo; kur ikan cik nin kibuta.

²⁰Cunya ramere kede par atek pi ngeno iswilia nin.

²¹In ibunano jo awakere, jo kame kotieko lamo kirac, jo kame parao tenge ki lubo cik nin;

²²kwany tenge ayet kede acae gi ki koma, pien ango agwoko cik nin.

²³Akadi bed bala jotel me piny di ko bedo piny poro kop arac i koma, do ango ngatic nin abino bedo paro iswilia nin i cunya.

²⁴Cik nin en kame miango yomcuny; gin en kame kimia tam.

²⁵Ango abuto piny lala i apua; dwok na kuo aber bala kame in iwaco.

²⁶Kakame ango atatamo nin kede yote na dedede, in iko gamo kwac na; pwonya iswilia nin.

²⁷Mia aniangi i kom iswilia nin, di ango ako bino bedo paro i cunya tice nin me aura.

²⁸Iturur obwono kuo na; mia adok tek bala kame in iwaco.

²⁹Gwoka abed bor kede yote me angalo; di iko pwonya iswilia nin pi kisa ni.

³⁰Ango atieko yero bedo ngat kame genere; atieko keto cunya lubo iswilia nin.

³¹Ango amoko i kom lubo cik nin, Okwe Rwot; kur iwek lewic maka.

³²Ango cunya mito kitek pi lubo cik nin, pien in imio niang nango doko tut.

³³Pwonya, Okwe Rwot, wek angei yongayo me iswilia nin, di ango ako bino lubo gi tuno i ajikini.

³⁴Mia niang tetekeny akaruno gwoko iswilia nin di ako lubo gi kede cunya lung.

³⁵Tela alub yongayo kame cik ni mito, pien ango cunya yom iye.

³⁶Lok cunya abed kede mit me lubo cik nin, do weko i kom bedo kede mit me ud pira kena.

³⁷Lok wanga tenge ki neno jamini kame kony gi li; miango kuo pi lubo yongayo nin.

³⁸Cob timo gikame in icikere iye but ngatic ni, gikame in icikere iye but jo kame lwori.

³⁹Lok tenge acae kame kelo nango lworo, pien iswilia nin beco.

⁴⁰Neni, ango cunya mito lubo cik nin; mia abed kuo pien in ipoore.

⁴¹Nyut na amara ni kalikame lokere, Okwe Rwot, di iko laka bala kame in iwaco be ibino timo.

⁴²Di ango ako bino bedo kede kop kame adwoko ne jo kame yeyeto ango, pien ango ageno kop nin.

⁴³Kur ikwany kop me ateni tenge ki doga, pien gen nango tie i kom iswilia nin.

⁴⁴Ango abino gwoko iswilia nin nakanaka, abino gwoko gi ikar kede ikar.

⁴⁵Abino bedo kede gonyere, pien ango abedo lubo cik nin.

⁴⁶Abino da yamo kop i kom cik nin i nyim abakai abongo mino lewic maka.

⁴⁷Ango audo yomcuny pi lubo cik nin, pi ango amaro gi.

⁴⁸Ango aworo doko amaro cik nin; abino bedo paro iswilia nin i cunya.

⁴⁹Yutuno kop kame in iwaco ne ngatic nin, kop kame oko mina abedo kede gen.

⁵⁰Gikame kweo cunya i kare kame atie kede i can en ine be, cikere nin mia kuo.

⁵¹Joewaka nyera twatwal, do ango likame aparao tenge ki iswilia nin.

⁵²Kame ango ayutuno iswilia nin cako i kare kasek, ango audo kweicuny, Okwe Rwot.

⁵³Ango cunya wang twatwal pi jo areco, jo kame dagi lubo iswilia nin.

⁵⁴Ango abedo wero iswilia nin i kabedere dedede kame ango abedo iye.

⁵⁵Esawa me iwor ango ayutuno in, Okwe Rwot, doko agwoko iswilia nin.

⁵⁶Ango atieko udo winyo noni, pien ango oudo abedo gwoko cik nin.

⁵⁷Rwot in ibedo mera; ango acikere pi lubo kope nin

⁵⁸Ango akwai kede cunya lung itim na bero; mi kisa maki keda di lubere kede cikere nin.

⁵⁹Kame ango aparo kop i kom yote nin, ango alokere lubo cik nin.

⁶⁰Ango aonyaro abongo gal pi lubo cik nin.

⁶¹Akadi di jo areco oluka kede owic gi, ango likame wia wil kede iswil nin.

⁶²I dier iwor ango ayai paki, pien iswilia nin opoore.

⁶³Ango abedo ngaupa me jo dedede kame lwori, ngaupa me jo agwoko cik nin.

⁶⁴Okwe Rwot, amara nin kalikame lokere opong i piny; pwonya iswilia nin.

⁶⁵In itieko timo ne ngatic ni bero, Okwe Rwot, di lubere kede kop nin.

⁶⁶Pwonya bedo kede rieko kede ngec, pien ango ayei cik ni.

⁶⁷Di pwodi oudo in likame iketo can i koma, ango oudo aparao tenge, do nataman alubo do kop nin.

⁶⁸In iber doko itimo bero; pwonya iswilia nin.

⁶⁹Joewaka yamo kope me abe i koma, do ango agwoko cik nin kede cunya lung.

⁷⁰Gin wi gi oding, do ango cunya yom i kom cik nin.

⁷¹Alola kame komia oudo obedo gikame ber nango, pien emia ako pwonyere i kom iswilia ni.

⁷²Iswil kame wok ki dogi ber nango kalamo saabu kede siliba tutumian kede tutumian.

⁷³In icwea kede cingi di iko keta i ekite kame nan atie kede; mia abed kede niang tetekeny apwonyere i kom cik nin.

⁷⁴Jo kame lwori bino nena di kiko bedo kede kilel, pien ango atieko keto gen na i kom kop nin.

⁷⁵Okwe Rwot, ango angeo be in ingolo kop i yore kopoore, doko ango ngeo be in igenere en komio imia alola.

⁷⁶Mi amara ni kalikame lokere kwei cunya di lubere kede cikere nin but ngatic nin.

⁷⁷Nyut na cuny me kisa me wek abed kuo; pien ango cunya yom i kom cik nin.

⁷⁸Mi lewic mak joewaka, pien gin kitera kirac kede angalo gi; do ango gira abino bedo paro cik nin i cunya.

⁷⁹Mi jo kame lwori lokere buta, me wek kingei cik nin.

⁸⁰Mia alub iswilia nin kede cunya lung, tetekeny kur mi lewic maka.

⁸¹Abedo kuri pi bino laka di ako ool; ango aketo gen na i kop nin.

⁸²Wanga ojony pi mito neno gikame in icikere iye; ango apenyere be, “Awene en kame in ibino kweno kede cunya?”

⁸³Pien ango atieko doko cal bala lau me keto bwini kame koweko i yiro, do ango likame wia owil kede iswilia nin.

⁸⁴Miero ngatic nin bed kanyakino pi kare kame rom amene? Awene en kame in ibino ngolo kede kop i wi jo kame tidilo ango?

⁸⁵Joewaka okunyo na bure be apot iye; gin likame kilubo iswil nin.

⁸⁶Cik nin dedede tie kakare; kotie tidilo ango abongo kop moro; Okwe konya!

⁸⁷Gin oudo kibuco jiko kuo na i wi lobo; do ango likame aweko lubo iswilia nin.

⁸⁸Pi amara nin kalikame lokere, gwok kuo na, tetekeny amoto akaruno lubo iswilia nin.

⁸⁹Kop nin, Okwe Rwot, bedo nakanaka; en etie kop me ateni ikar kede ikar i malo.

⁹⁰In igenere but jo me kare dedede; in itieko cibo lobo kabedo mere, en ecungo di etek nakanaka.

⁹¹Gi dedede cungo tuno tin pi in iciko kamanono, pien giacwea dedede timo tic piri.

⁹²Ka koto oudo iswil nin likame yomo cunya, oudo koto ango ato pi can kame aneno.

⁹³Ango wia likame bino wil kede iswilia nin, pien in itieko minango kuo pi gin.

⁹⁴Ango abedo meri, laka; pien ango abedo tamo lubo cik nin.

⁹⁵Jo areco obuto piny kipwono kura pi muducaro ango, do ango par na tie i kom cik nin.

⁹⁶Ango atieko neno be gi dedede abeco tie kede ajikini gi, do cik nin likame tie kede ajikini.

⁹⁷Okwe, ango tin amaro iswilia nin benyo! Ango abedo paro gi i cunya piny yuluyul.

⁹⁸Cik nin miango abedo riek kalamo jokwor na, piento en etie keda i kare dedede.

⁹⁹Ango atie kede niang kame kalamo me jopwonye na dedede, pien ango aparo cik nin i cunya nakanaka.

¹⁰⁰Ango aniang kalamo jo oti, pien ango agwoko iswilia nin.

¹⁰¹Ango agengo tiena lubo yote dedede areco, me wek alub kop nin.

¹⁰²Ango likame aparao tenge ki lubo cik nin, pien in itieko pwonya.

¹⁰³Kope nin tin mit benyo i leba, kiwinyiwinyi i doga kalamo mokic!

¹⁰⁴Ango audo niang ki iswilia nin; pi mano, ango cunya dagi yote dedede me angalo.

¹⁰⁵Kop nin en etala kame menyo kakame tiena lubo, doko en lero kame menyo yongayo nango.

¹⁰⁶Ango atieko kwongere di ako moko kwongere nono, pi lubo iswilia nin kopoore.

¹⁰⁷Ango atie neno can twatwal; Okwe Rwot, mia abed kuo bala kame in iwaco.

¹⁰⁸Gam giamia na me pak, Okwe Rwot, doko pwonya iswilia nin.

¹⁰⁹Ango atieko iikere pi jalo kuo na i kare lung, do likame wia wil kede iswilia nin.

¹¹⁰Jo areco otieko cika kede owic, do ango likame aparao tenge ki lubo cik nin.

¹¹¹Cik nin obedo mega pi kare lung; gin en kame kiyomo cunya.

¹¹²Ango aketo cunya lubo iswilia nin; abino timo kamanono tuno i ajikini.

¹¹³Ango cunya dagi jo kame tam gi okakarun, do ango amaro iswil nin.

¹¹⁴In en kapwono nango doko in en ebuku na; ango aketo gen na i kom kop nin.

¹¹⁵Orwaunu tenge kibuta, wun jo kame timo gikareco, me wek ango agwok cik ka Rubanga na.

¹¹⁶Ganga di lubere kede cikere nin, tetekeny abed kuo, doko kur imi lewic maka i gen na.

¹¹⁷Konya tetekeny aud gwok aber, di ako bedo paro pi iswilia ni nakanaka.

¹¹⁸In idagi jo dedede kame parao tenge ki lubo iswilia nin; pien rieko gin me angalo kony mere li.

¹¹⁹In itero jo areco dedede me wi lobo bala yugi; pi mano, ango amaro cik nin.

¹²⁰Koma miel pi lwori, doko ango alworo ngolo kop nin.

¹²¹Ango atieko timo gi me ateni kame poore; kur ijala i cing jo kame tie tera kirac.

¹²²Mok be ngatic ni bino bedo kiber; kur iwek jo kalikame ngei tera kirac.

¹²³Wanga ojony pi kuro neno alako nin, kede pi kuro neno cobere me cikere nin kopoore.

¹²⁴Tii kede ngatic ni di lubere kede amara ni kalikame lokere, doko pwonya iswilia ni.

¹²⁵Ango ngatic ni; mia abed kede niang, tetekeny angei cik ni.

¹²⁶Okwe Rwot, kare do oromo me in timo tic ni, pien kotieko turo iswil ni.

¹²⁷Ateteni ango amaro cik nin kalamo saabu kame kojililo kiber.

¹²⁸Ateteni ango amio iswilia nin dedede en kame telo kuo na; cunya dagi yote dedede me angalo.

¹²⁹Iswilia nin beco beco me aura; pi mano, ango alubo gi.

¹³⁰Yabere me kop nin kelo ne jo lero; ekelo niang ne jo kame kwia piny.

¹³¹Ango angamo doga kede imue, pien cunya mito cik nin twatwal.

¹³²Lokere buta di iko mino kisa maki keda, bala kame in itimo ne kede jo kame mari.

¹³³Mia aoti abongo riangar di lubere kede cikere nin, doko kur iwek dub puga.

¹³⁴Laka kibut jo kame tera kirac, tetekeny akaruno gwoko iswilia ni.

¹³⁵Mi kisa maki kede ngatic ni, doko pwonya iswilia ni.

¹³⁶Ango akok pigewanga mol loiloi pien jo likame gwoko iswil nin.

¹³⁷Okwe Rwot, in ipoore, doko in ingolo kop i yore kopoore.

¹³⁸Iswilia kame in imio beco doko kipoore.

¹³⁹Nyeko na piri liel bala mac pien wi jokwor na wil kede kop nin.

¹⁴⁰Kotieko tamo cikere nin kiber, doko ngatic nin mare.

¹⁴¹Ango likame pira tek doko kocaa, do ango likame wia wil kede iswilia nin.

¹⁴²Poore nin bedo nakanaka, doko iswilia nin obedo me ateni.

¹⁴³Peko kede par atek omaka, do cik nin kelo nango yomcuny.

¹⁴⁴Iswilia nin opoore nakanaka; mia abed kede niang tetekeny abed kuo.

¹⁴⁵Ango akok buti kede cunya lung; gam kwac na, Okwe Rwot. Ango abino gwoko iswilia nin.

¹⁴⁶Ango akok buti; laka, di ango ako bino lubo iswilia ni.

¹⁴⁷Ango ayai di obai likame pwodi otuno di ako kok buti pi konya; ango aketo gen na i kom kope nin.

¹⁴⁸Ango abuto di wanga twolo iwor kiakia, me wek abed paro i cunya kope me cikere nin.

¹⁴⁹Pi amara ni kalikame lokere, winy dwana; Okwe Rwot, gwok kuo na, pien in ingolo kop i ateni.

¹⁵⁰Jo kame tidilo ango di kitie kede tam arac i koma tie noka; gin likame kiparo lubo iswil nin.

¹⁵¹Do in itie iyapiyapi keda, Okwe Rwot, doko cik nin dedede obedo me ateni.

¹⁵²Ango bin sek audo niang ki iswilia nin be in itieko keto gi pi bedo nakanaka.

¹⁵³Nen can kame ango atie iye di iko laka, pien ango likame wia wil kede iswil nin.

¹⁵⁴Pid pira di iko laka; mia abed kuo di lubere kede cikere nin.

¹⁵⁵Jo areco likame bino udo alako, pien gin likame kilubo iswilia nin.

¹⁵⁶Cuny me kisa nin dwong, Okwe Rwot; mia abed kuo di lubere kede ngolo kop nin me ateni.

¹⁵⁷Jokwor na kede jo kame tidilo ango tot, do ango likame ariangar tenge ki iswilia nin.

¹⁵⁸Ango aneno jo kame li kede yei reco ki wanga, pien gin likame kigwoko cik nin.

¹⁵⁹Okwe Rwot, nen kite kame ango amaro kede iswilia nin. Gwok kuo na di lubere kede amara nin kalikame lokere.

¹⁶⁰Kop nin lung cungo i kom ateni; doko iswilia nin kopoore bedo nakanaka.

¹⁶¹Jotel tidilo ango abongo kop moro, do ango cunya tie kede wor i kom kope nin

¹⁶²Ango alelo pi kop nin bala ngat koudo jamini atot kame koyako ki yi.

¹⁶³Ango cunya dagi angalo, doko anene erac ki wanga, do ango amaro iswil nin.

¹⁶⁴Ceng acelacel ango apaki tien kanyaare pi iswilia nin kopoore.

¹⁶⁵Jo kame maro iswil nin tie kede mulem adwong; likame tie gimoro kame karuno getaro gi.

¹⁶⁶Ango ageni pi laka, Okwe Rwot, doko ango atimo gikame cik nin mito.

¹⁶⁷Ango agwoko cik nin; cunya maro gi twatwal.

¹⁶⁸Ango agwoko iswilia kede cik nin; pien gi dedede kame ango atimo idelelei i nyimi.

¹⁶⁹Wek koko na tuni i nyimi, Okwe Rwot; mia abed kede niang di lubere kede kop me cikere nin.

¹⁷⁰Wek kwac na tuni i nyimi; laka di lubere kede cikere nin.

¹⁷¹Doga bino paki, pien in ipwonya iswilia nin.

¹⁷²Leba bino wero kop me cikere nin, pien cik nin dedede opoore.

¹⁷³Bed di i iikere pi konya, pien ango atieko yero lubo iswilia nin.

¹⁷⁴Ango akuro alako nin, Okwe Rwot, doko iswilia nin yomo cunya.

¹⁷⁵Mia abed kuo tetekeny apaki, doko mi iswilia nin konya.

¹⁷⁶Ango atieko parao tenge bala oromo korwenyo; moi ngatic ni, pien ango likame wia wil kede cik nin.