Read kumam Sabuli 132 Bible Online

Sabuli 132 - kumam bible

Sabuli 132

¹Okwe Rwot bed kede iyutun i kom Daudi, pi can dedede kame en ebedo kanyo;

²epone kame bin en elairo kede but Rwot; epone kame ekwongo kede but Won Twer kame Yakobo bin woro, di ewaco be,

³“Ango likame abino donyo i oda arabo yito i kabuto na;

⁴ango likame abino nino, arabo amemerun ako mino wanga,

⁵paka tuno di atieko udo kabedo ne Rwot, tuno di audo kabedo ne Won Twer kame Yakobo bin woro.”

⁶Wan owinyo kop kame mako Sanduku me Isikan i Epurata; wan oude i poti me Yaar.

⁷Wan oko waco be, “Ootunu kakame en ebedo iye; orieberenu pi wore i nyim kom mere me ajakanut.”

⁸Yai, Okwe Rwot, di iko ot kabedo ni me wei, in karacel kede Sanduku me twer nin.

⁹Miero josaseredoti nin ngap poore bala egoe, kede jo kame wori ko ilelem pi yomcuny.

¹⁰Pi ngatic ni Daudi, kur idagi dano ni kame itieko yero.

¹¹Rwot okwongo but Daudi ikwong me ateni, kalikame doko eromo loko tam mere kiye: “Abino mino ngat acel kikom awobe ni bedo i kom nin me ajakanut.

¹²Ka awobe ni bino gwoko isikan na kede gi kede cik kame ango abino pwonyo gi, idwe gi da bino lunyo kom gi me ajakanut nakanaka.”

¹³Pien Rwot otieko yero Sion; cunye mito be edok kabedo mere:

¹⁴“Man en kawei na pi kare lung, ango abino bedo kanoni, pien cunya otieko mite.

¹⁵Abino mino Sion gi dedede kame emito di tot, abino mino jocan kame tie iye yeng kede cam.

¹⁶Abino ngapo josaseredoti kame tie iye kede alako, di jo agenere kame tie iye ko bino ilelem pi yomcuny.

¹⁷Ki kuno abino mino twon twer me abaka but ngat acel kikom ikwae ka Daudi; ango abino mino apugan me dano na kame ayero bedo nakanaka.

¹⁸Abino ngapo jokwor mege kede lewic, do ocoro mere me ajakanut bino medo meny ameda.”