Read kumam Sabuli 137 Bible Online

Sabuli 137 - kumam bible

Sabuli 137

¹Wan bin obedo piny i nget ecilet me Babilon, di oko kok kakame oyutuno kede Sion.

²Wan oko weko gono adungu wa oko liero gi malo i kor yen.

³Pien jo kame oudo omako wa openyo wa were mogo; jo kame oudo tidilo wa openyo wa pi yomo cuny gi di kiwaco be, “Werunu ne wa wer acel moro me Sion!”

⁴Epone mene kame wan oudo otwero wero kede wer ka Rwot i lobo me obukui?

⁵Ka wia owil kedi, Okwe Yerusalem, poore bada tetu cam bed di omito!

⁶Leba miero mok i dana ka ango likame ayutuno in, ka likame atamo pi Yerusalem bala gikame yomo cunya kalamo gi dedede.

⁷Yutuno iko maro i wi jo me Edom, Okwe Rwot, ceng kame korereto kede Yerusalem, di gin oudo kiwaco be, “Tiatiaunu en! Tiatiaunu en! Tiatiaunu en tuno piny i acakini me apama mere!”

⁸In nyar ka Babilon, in ngadudubo! Kibino bedo kede yomcuny jo kame bino culo i komi raco kame in itimo ne wa.

⁹Kibino bedo kede yomcuny jo kame bino tero idwe ni di kiko nyinyito gi i lela!