Read kumam Sabuli 143 Bible Online

Sabuli 143 - kumam bible

Sabuli 143

¹Okwe Rwot, winy ilega na, cik yiti iwiny kwac na pien in igenere; gam kwac na pien in ipoore.

²Kur ingol ne ngatic ni kop, pien likame tie ngatamoro kame kuo kopoore i nyimi.

³Pien ngakwor otieko wapa di eko reta piny. Emia abedo i colo bala jo kotieko to riki sek.

⁴Pi mano, cunya do okwanyere; cunya odoko li.

⁵Ango ayutuno kare kokato cen, aparo kop i kom gi dedede kame in itieko timo, aparo i cunya tice kame cingi otimo.

⁶Ango atingo cinga malo buti i ilega; cunya miti bala kame lobo kotuo mito kede pii.

⁷Okwe Rwot, gam kwac na awakawaka; cunya okwanyere. Kur ikan na wangi, ka li, ango abino bedo cal bala jo kame donyo piny i ates.

⁸Mia awiny odiko acelacel kop me amara ni kalikame lokere, pien ango aketo gen na buti. Pwonya yongayo kame poore alubi, pien ango acwao kwac na buti.

⁹Okwe Rwot, laka ki cing jokwor na; ango atieko ringini gwokere buti.

¹⁰Pwonya timo gikame in imito, pien in ibedo Rubanga na. Mi tipo ni aber tela i yongayo apwot di oriere.

¹¹Pi nyingi, Okwe Rwot, gwok kuo na. Wota ki peko pien in ipoore.

¹²Pi amara ni kalikame lokere, nek jokwor na, doko muducaro jo dedede kame daga, pien ango abedo ngatic ni.