Read kumam Sabuli 145 Bible Online

Sabuli 145 - kumam bible

Sabuli 145

¹Ango abino paki, Rubanga na kede Abaka na, doko abino pako nyingi ikar kede ikar.

²Abino paki ceng dedede, doko abino pako nyingi ikar kede ikar.

³Rwot dwong twatwal doko epoore me apaka; dwongo mere kalamo ngec me jo.

⁴Lwak me kare acelacel bino pako tice kame in itimo but lwak kame lubo, doko kibino tatamo tice nin me aura.

⁵Ango abino bedo paro i cunya kop i kom tice nin me aura, kede kop i kom deyo adwong me angosibib nin.

⁶Jo bino tatamo twer kame in itimo kede tice me alwora, doko ango abino tatamo dwongo ni.

⁷Gin kibino tatamo iruo me twon bero nin, doko kibino wero kop i kom poore nin kede dwan amalo.

⁸Rwot ngakisa doko etimo ne jo mwolo, en likame ebunyo doko ger, doko epong kede amara kalikame lokere.

⁹Rwot ber but jo dedede, doko cuny me kisa mere tie i kom gi dedede kame en ecweo.

¹⁰Gi dedede kame in icweo bino pwoni, Okwe Rwot, doko jo ni dedede kame genere bino paki.

¹¹Gin kibino waco kop me deyo me ajakanut ni, doko kibino tatamo kop i kom twer nin,

¹²pi mino jo dedede ngeno tice nin me twer, kede deyo adwong me ajakanut nin.

¹³Ajakanut nin bedo nakanaka, doko apugan nin tie pi lwak me i kare dedede. Rwot genere i kope mege dedede, doko etie kede kisa i gi dedede kame en etimo.

¹⁴Rwot konyo jo kame tie poto; en ekiarao jo dedede kame cuny gi odoko goro.

¹⁵Wang dedede nenin, doko in imio gin cam i kare kopoore.

¹⁶In iyaro cingi, di iko mino gi dedede kame kuo yeng.

¹⁷Rwot timo gi dedede i yore kopoore, doko etie kede mwolo i gi dedede kame en etimo

¹⁸Rwot tie iyapiyapi but jo dedede kame lwonge, jo dedede kame lwonge i ateni.

¹⁹En ecobo mit me jo dedede kame lwore; doko da ewinyo koko gi di eko lako gi.

²⁰Rwot gwoko jo dedede kame mare, do jo areco dedede en ebino muducaro.

²¹Ango abino pako Rwot nakanaka, doko gi dedede akuo bino pako nyinge kacil ikar kede ikar.