Read kumam Sabuli 25 Bible Online

Sabuli 25 - kumam bible

Sabuli 25

¹Amio kuo na butin Rwot.

²Okwe Rubanga na, ango aketo gen na buti, kur iwek jo mia lewic, kur iwek jokwor na leli i wia.

³Kur imi lewic mak jo kame geni, Okwe Rwot; do mi lewic mak jo kame jemo ni nono nono.

⁴Mia angei yote ni, Okwe Rwot; pwonya timo gikame in imito.

⁵Tela alub ateni nin, di ipwonya; pien in en Rubanga kame laka; ango ageni nakanaka.

⁶Yutuno mwolo ni, kede amara ni kalikame lokere, Okwe Rwot, pien in ibedo tie kede gi cako sek.

⁷Kur iyutuno dub kame atimo i kare me tino na akadi raco kame atimo da; do yutuno ango, Okwe Rwot, pi bero nin, di lubere kede amara nin kalikame lokere.

⁸Rwot ber, doko en epoore, manono en komio en epwonyo jodubo yongayo kame kipoore lubo.

⁹En etelo jo kame mwol timo gikame opoore, doko epwonyo gi yongayo mere.

¹⁰Yote ka Rwot dedede opong kede amara kalikame lokere kede gen, pi jo kame gwoko isikan kede cik mege.

¹¹Pi ber nyingi, Okwe Rwot, sasiro raco na pien edwong twatwal.

¹²Alu en kame tie kede wor but Rwot? En ebino pwonyo gi ngeno yongayo kame kipoore lubo.

¹³Gin kibino bedo kede kuo aber, di lobo ko bino doko me ikwae gi.

¹⁴Rwot mako adiereson kede jo kame tie kede wor bute, di eko mino gi kingeo isikan mere.

¹⁵Ango nakanaka aciko wanga i kom Rwot, piento en ebino gonyo tiena ka omoko i owic.

¹⁶Lokere buta iko bedo kede kisa i koma, pien ango atie do kena, doko can opoto i koma.

¹⁷Mia alakanar ki can kame tie i cunya, di iko wota tenge ki peko na dedede.

¹⁸Tam pi can kame atie neno kede peko na, di iko sasiro dub na.

¹⁹Tam pi wel me jokwor na, di iko neno twon adagadaga kame kitie kede buta.

²⁰Okwe, gwok kuo na, doko laka; kur ijal jo mia lewic, pien ango aringino gwok buti.

²¹Mi bero kede poore nin gwoka, pien ango aketo gen na buti.

²²Okwe Rubanga, lak Isirael ki peko mege.