Read kumam Sabuli 28 Bible Online

Sabuli 28 - kumam bible

Sabuli 28

¹Rwot, ango akok buti; in en lela na, kur idagi winyo kop na. Pien ka iling na alinga, abino bedo rom aroma kede jo kame donyo i bur me to.

²Winy kwac na kame abako kede doga buti pi konya, di atango cinga malo i kabedo ni kacil kalamo.

³Kur ingola kop karacel kede jo areco, jo kame timo tim areco, gin jo kame dog gi yamo kope abeco me awotin kede jokio gi, do di cuny gi col adikinicel.

⁴Mi gi cul arom aroma kede tice gi, kame rom aroma kede tim gi areco; mi gi cul arom aroma kede tice me cing gi, cul kame poore kede gi.

⁵Pi kite kalikame gin kiparo kede tic kame Rwot otimo, akadi gikame cinge ocweo, manono bino mino etuturo gi di likame eko bobo gero gi kicungo malo.

⁶Pak bed but Rwot, piento en etieko winyo bako doga.

⁷Rwot en ngateko kede ebuku kame gwoka, cunya gene. En ekonya di cunya ko lelo; ango awero wer me pwone.

⁸Rwot en ngateko kame gwoko jo mege, en ebedo karingo ot gwok kame lako dano mere kame eyero.

⁹Okwe Rwot, lak jo ni, mi winyo but jo kame obedo megi; tim ber ibed ngakwat gi, doko gwok gi nakanaka.