Read kumam Sabuli 29 Bible Online

Sabuli 29 - kumam bible

Sabuli 29

¹Wacunu kop kame mio Rwot gikame poore ne, wun gikame kuo i malo; wacunu be deyo kede teko obedo mere.

²Wacunu be deyo obedo me ka Rwot, en deyo kame tie i nyinge, worunu Rwot kede angosibib kacil.

³Dwan Rwot winyere i wi name; dwan Rwot me deyo winyere bala mwoc me kot, dwan Rwot winyere i wi name adongodongo.

⁴Dwan Rwot tie kede twer, dwan Rwot tie kede dwongo.

⁵Dwan Rwot tuturo seda,[2] dwane tuturo kiton seda me Lebanon.

⁶En emio moru me Lebanon takaro bala roya, kede me Sirion ko takaro bala atin twon.

⁷Dwan Rwot caro asara kame liel bala leb mac.

⁸Dwan Rwot yayango wi tim; dwane yayango wi tim me Kades.

⁹Dwan Rwot yayango yen kame kolwongo be oak, dwane gwero abum piny; jo dedede waco i tempulo mere be, “Deyo bed but Rubanga.”

¹⁰Rwot en kame pugo twon pii me alele; en ebedo i kom mere me ajakanut ikar kede ikar.

¹¹Akwao Rwot mi jo mege teko! Akwao Rwot mi jo mege winyo me bedo kede anapakin.