Read kumam Sabuli 32 Bible Online

Sabuli 32 - kumam bible

Sabuli 32

¹Kitie kede yomcuny gin jo kame kosasiro tim gi areco, jo kame koumo dub gi.

²Kitie kede yomcuny gin jo kame Rwot likame maro rac moro i wi gi, kede kame tim me angalo likame tie i kuo gi.

³I kare kame oudo aling kede likame atuco dub na, koma oudo odoko goro pi koko piny yuluyul.

⁴Pien in oudo ibedo mina alola iwor kede iceng; teko na oko tiek bala pii kame tuo i kare me oro.

⁵Di do ango ako tuco dub na buti, doko likame ako kano tim na areco; ango oudo awaco be, “Ayaro tuco gikareco na but Rwot,” bin in iko sasiro ango ki raco na.

⁶Pi mano, mito jo kame wori leg buti i kare me peko; i kare kame peko bino kede bala ariram, likame ebino tuno but gi.

⁷In en kapwono nango; in igwoka ki peko; in iluka kede ilelem me jo kame lelo pi alako na.

⁸Rwot owaco be, “Ango ayaro nyuto ni doko ayaro pwonyi yongayo kame poore ilubi; abino mini tam doko likame abino kwanyo wanga ki komi.

⁹Kur ibed abongo niang bala asigira arabo punda, kame miero iket lilim doko itwei auno i doge pi mine timo gikame in imito.”

¹⁰Can kame jo areco neno tot, do jo kame geno Rwot tie i amara mere kalikame lokere.

¹¹Okwe wun jo kopoore, bedunu kede yomcuny doko lelunu pi gikame Rwot otimo, doko lelemunu pi yomcuny, wun jo kame cunyu opoore.