Read kumam Sabuli 33 Bible Online

Sabuli 33 - kumam bible

Sabuli 33

¹Lelunu i Rwot, wun jo kopoore. Jo kame timo gikame Rubanga mito poore pake.

²Pakunu Rwot kede arigirigi; gounu ne wer amit kede adungu kame tie kede ausin tomon.

³Werenu wer anyen; gounu ne wer kede diru di ilelemunu kitek.

⁴Pien kop ka Rwot tie me ateni, doko gi dedede kame en etimo genere.

⁵En emaro poore kede ngolo kop i ateni; amara mere kalikame lokere dwong i piny.

⁶Rwot ocweo malo kede kop mere, doko ecweo gi dedede kame tie iye kede kop me doge.

⁷Eko coko pii me nam karacel bala piko pii i cupa; ecoko pi me nam bala gikame kocoko i dero.

⁸Lobo lung poore wor Rwot; mito jo dedede kame tie i piny bed kede wor bute.

⁹Piento en bin ewaco kop, di piny oko bedo tie; emio cik di piny oko cwere.

¹⁰Rwot mio gikame atekerin oiko pi timo likame cobere; en etotolo iik me jo.

¹¹Do iik ka Rwot cungo nakanaka, gikame cunye paro tie pi lwak me kare dedede.

¹²Etie kede yomcuny ateker kame Rubanga mere en Rwot, jo kame en etieko yero pi bedo mege.

¹³Rwot neno piny ki malo; en eneno jo dedede.

¹⁴Ki kabedo mere me pug, en engico jo dedede kame bedo i wi lobo.

¹⁵En ngat kame ecweo cuny gin dedede, engeo gikame gin kitimo dedede.

¹⁶Akadi di abaka tie kede isirikalen atot, likame gin kikaruno gwoke; ngat kame tek i yi likame lo yi pi teko mere.

¹⁷Ka pi lono yi, asigira me yi kony mere li, doko teko mere likame karuno gwoko ngat kame wanano en.

¹⁸Ateteni wang Rwot tie i kom jo kame wore, jo kame tie kede gen i amara mere kalikame lokere.

¹⁹En elako kuo gi ki to, doko egwoko gi kibedo kuo i kare me kec.

²⁰Wan ogeno Rwot kede kuo wa lung; en ngakony wa kede ebuku kame gwoko wa.

²¹Cuny wan yom pire, piento wan ogeno nyinge kacil.

²²Okwe Rwot, mi amara ni kalikame lokere bed but wa, bala kame wan oketo kede gen wa i komi.