Read kumam Sabuli 34 Bible Online

Sabuli 34 - kumam bible

Sabuli 34

¹ Abino pako Rwot i kare dedede; doga bino pake nakanaka.

²Ango awakere pi gikame Rwot otieko timo; winyunu wun jo kame koridakino wu di ikounu ilel.

³Miunu Rwot dwongo, wun karacel keda, opakunu nyinge karacel.

⁴Ango ako lego but Rwot, di en eko gamo kwac na, en elaka ki gi dedede kame oudo kelo na lworo.

⁵Genenu, di ikounu ilel; en likame ebino mino wu lewic.

⁶Jo kame tie i peko okok but Rwot, di Rwot oko winyo koko gi, eko lako gi ki peko gi dedede.

⁷Malaika ka Rwot gwoko jo kame woro Rwot, doko elako gi ki peko.

⁸Okwe ber tami di iko bino neno bero ka Rwot; kitie kede winyo gin jo kame ringo gwokere bute.

⁹Okwe worunu Rwot, wun jo mege kacil, pien jo kame wore likame bedo kede rem moro.

¹⁰Akadi inguon atino da tie kede rem, doko kec neko gi, do jo kame mo Rwot bedo tie kede gi dedede abeco.

¹¹Bianu, wun idwe, winyunu; ango ayaro pwonyo wu woro Rwot.

¹²Ngai kikom wu kame mito kuo, doko emito neno ceng atot me kuo aber?

¹³Gwok lebi ki gikarac, kede igwok dogi ki yamo kop me abe.

¹⁴Yai tenge ki timo gikarac, di iko donyo timo gikaber; moi gikame kelo mulem, di iko lubo yore.

¹⁵Wang Rwot tie i kom jo kopoore, doko ewinyo koko gi.

¹⁶Rwot dagi jo kame timo gikareco, en emio wi jo wil kede jo nogo kame kito.

¹⁷Kame jo kopoore kok pi mito kony, Rwot winyo koko gi, di eko lako gi ki peko gi dedede.

¹⁸Rwot tie iyapiyapi kede jo kame cuny gi odwono, doko elako jo kame gen gi do otiek.

¹⁹Can kame jo kopoore neno tot, do Rwot lako gi ki can nogo dedede.

²⁰En egwoko gi kiber; likame akadi cogo gi acel da tur.

²¹Gikarac kelo ne jo areco to, doko jo kame cuny gi kec i kom jo kopoore kobino ngolo kop lo gi.

²²Rwot lako kuo me jotic mege; likame tie ngatamoro kame ringo gwokere bute kame kobino ngolo kop lo.