Read kumam Sabuli 37 Bible Online

Sabuli 37 - kumam bible

Sabuli 37

¹Kur cunyi poti pi jo areco; kur nyeko maki kede jo kame timo gikarac,

²pien gin kibino rwenyo wir awakawaka bala lum atuo, kibino ner bala pote me yen.

³Gen Rwot, doko tim gikame ber; manono bino mino ibedo i lobo kame komio wu, di itie kede anapakin.

⁴Bed kede yomcuny i Rwot, di en eko bino mini gikame cunyi mito.

⁵Mi kuo ni i cing Rwot; ket gen ni bute, di en eko bino konyi.

⁶En ebino mino poore nin rieny bala lero, kede ateni me gikame in itimo rieny bala i dier iceng.

⁷Bed mot i nyim Rwot, di iko dire kuro gikame en eyaro timo; cunyi kur poti pi jo kame udo abar pi tim gi, arabo pi jo kame cobo iik gi areco.

⁸Wek tim me gero, doko wek lilo. Kur cunyi poti, manono kelo nin raco kenekene.

⁹Pien kobino riamo jo areco tenge, do jo kame geno Rwot, lobo kame Rubanga ocikere pire bino doko mergi.

¹⁰Odong kare kacecek di jo areco rwenyo; akadi imoi kabedo gi benyo, likame ibino udo gi.

¹¹Do jo amwol, lobo nono bino doko mergi di kiko bedo kede yomcuny pi jamini atot abeco.

¹²Jo areco iiko tam i kom jo kopoore, di kikao lak gi pi nyuto gero i kom gi;

¹³do Rwot nyero jo areco anyera, piento en engeo be ceng gi tie bino.

¹⁴Jo areco woto epima kede kiciko imalia gi me neko jocan kede jo apiny olo, me neko jo atimo gi kopoore,

¹⁵do ipimai gi nogo en kame kobino cocobo kede cuny gi, di oko bino tuturo imalia gi.

¹⁶Gi atitidi kame dano kopoore tie kede ber lo abar me jo areco.

¹⁷Pien twer me jo areco kobino jiko, do Rwot gwoko jo kopoore.

¹⁸Rwot paro pi jo kalikame tie kede raco moro, doko gikame komio gi bino bedo mergi nakanaka;

¹⁹i kare arac likame komio lewic mako gi, i kare me kec gin kibedo tie kede cam atot.

²⁰Do jo areco bino to, jokwor ka Rwot cal bala deyo me lum; gin kibino rwenyo, kibino rwenyo wir bala yiro.

²¹Jo areco kopao jame do likame kiculo, do jo kopoore cuny gi ler, gin kimeede ameda kede mic.

²²Pien jo kame Rwot otieko mino winyo, lobo bino doko mergi, do jo kame en etieko lamo, kobino riamo tenge.

²³Rwot en kame telo wa i yongayo kame olubo, ka kuo wa yomo cunye;

²⁴akadi ogetar, likame obino poto adule, pien Rwot mako cing wa.

²⁵Cako di bin pwodi ango atin, tuno nan di atieko ti, likame pwodi aneno jo kopoore di Rwot oweko gi atatai, arabo neno di idwe gi kwao cam.

²⁶I kare dedede gin kibedo mino amia jo jame, doko jo kopao jame kibut gi; idwe gi tie winyo but gi.

²⁷Wek timo gikarac di iko donyo timo gikaber; iko bino bedo nakanaka i lobo kame Rubanga ocikere pire.

²⁸Pien Rwot maro gi me ateni; en likame ebino weko atatai jo mege kame gene.

²⁹Jo kopoore lobo nono bino doko mergi, di gin kiko bino bedo iye nakanaka.

³⁰Dog jo kopoore yamo kop me rieko, doko leb gi yamo kop me ateni.

³¹Iswil ka Rubanga gi tie i cuny gi; likame kicetar tenge kiye.

³²Jo areco ngico jo kopoore, di kimito neko gi;

³³do Rwot likame bino jalo jo kopoore i cing gi, arabo jalo kongolo kop lo gi ka kotie pido gi.

³⁴Gen Rwot, doko lub yongayo mere, di en eko bino tingi malo eko mino lobo nono doko meri; in ibino neno amuducar me jo areco.

³⁵Ango atieko neno ngat arac di etero jo kirac, do di emeede dongo bala yat seda me Lebanon.

³⁶I cen mere ango bobo ako beo kuno, do ako udo edoko li; ango ako mone do likame ako karuno ude.

³⁷Niangunu i kom jo kame li kede raco moro, nenunu jo kopoore; pien jo kame maro mulem bedo tie kede ikwae.

³⁸Do jotur iswil kobino muducaro gin dedede; ikwae me jo areco kobino tiekaro.

³⁹Alako me jo kopoore wok kibut Rwot; en etie karingo gi i kare me peko.

⁴⁰Rwot konyo gi di eko lako gi; en elako gi ki cing jo areco, pien gin kiringo ot gwokere bute.