Read kumam Sabuli 40 Bible Online

Sabuli 40 - kumam bible

Sabuli 40

¹Ango ako kuro kony ka Rwot kede dire adwong; en eko ciko yite ewinyo koko na.

²En eko wota ki bur koling, ewota ki cwoto, di eko ciba i wi lela, eko mina teko me ot.

³En eko pwonya wer anyen, wer me pako Rubanga wa. Jo atot bino neno di kiko bino bedo kede lworo, di kiko bino keto gen gi i kom Rwot.

⁴Kitie kede yomcuny gin jo kame geno Rwot, jo kalikame lokere but joewaka, but jo kame parao lubo rubangan me angalo.

⁵Okwe Rwot Rubanga na, in itieko medo ameda tice ni me aura kede iik nin pirwa; likame tie ngat kame karuno porere kedi. Ka koto oudo awaco be atatamo gi dedede, koto kibedo tot tot kalikame marere.

⁶In likame imito giayala kede giamia. In likame imito leini awanga kede giamia pi kwanyo dub; do in itieko yabo yita pi winyo kop.

⁷Di do ango ako waco be, “Ango ine, atie bino; bala kame kowandiko kede kop i koma i itabu me Iswil.

⁸Okwe Rwot Rubanga na, ango cunya yom pi timo mit nin; iswil nin tie i cunya.”

⁹Ango atieko tatamo kop aber amako alako nin i kacokere adwong me jo ni; Okwe Rwot, neni, ango likame ako ling, bala kame in ingeo.

¹⁰Ango likame amungo kop me alako nin, ango atieko tatamo kop i kom genere nin kede kite kame in ilako kede jo; ango likame amungo ne cokere adwong me jo ni amara nin kalikame lokere kede genere nin.

¹¹Okwe Rwot, kur ikwany cunyi me kisa ki koma; wek amara nin kalikame lokere kede genere nin gwoka kiber nakanaka.

¹²Pien peko kame tot tot kalikame marere otieko luka; dub na otieko bwona bwon kalikame bobo akaruno neno kede gimoro; kitot kalamo yer me wia, doko cunya otieko kwanyere.

¹³Okwe Rwot, mi cunyi bed yom laka; Okwe Rwot, susunyo bino konya.

¹⁴Mi lewic kede atotolun mak jo kame mito kwanyo kuo na; mi koriam jo kame mito timo na rac, kidok cen kede lewic.

¹⁵Mi cuny gi dubere pi lewic gi, gin jo kame nyera.

¹⁶Do mi jo dedede kame moi bed kede ilel kede yomcuny; mi jo kame maro alako nin wac nakanaka be, “Rwot dwong!”

¹⁷Do ango gira angacan, piny oloa, do Rwot paro pira. In en ngakony na kede ngalak na; Okwe Rubanga na, kur igali.