Read kumam Sabuli 41 Bible Online

Sabuli 41 - kumam bible

Sabuli 41

¹Kitie kede yomcuny jo kame paro pi jocan; Rwot bino konyo gi ka kitie i peko.

²Rwot gwoko gi, doko emio gi kibedo kuo; kobino tero be kitie kede yomcuny i lobo; Rwot likame bino weko gi i cing jokwor gi.

³Rwot konyo gi ka tuwo oreto gi piny i apien; en ebino cango gi ki tuwo dedede kame kitie kede.

⁴Do ango awaco gira be, “Okwe Rwot, ango adubo i nyimi; mi kisa maki i koma iko canga.”

⁵Jokwor na yamo kirac i koma, di kiuro be awene en kame ango abino to kede di nyinga ko rwenyo.

⁶Doko kame kibino nena, kiyamo kope kalikame tie ateni; cuny gi coko kope areco i koma; kame kiyai kioto, kiko do donyo sarakino gi.

⁷Jo dedede kame daga weweo kope karacel i koma; kibedo paro be koto jamini areco otimere na.

⁸Gin kiparo be tuwo arac kame bino neka otieko rona roc, be likame bobo abino twero yai ki apien.

⁹Akadi kiton adiera apire tek kame oudo ageno, ngat kame oudo acamo kede, otieko da loka adoko ngakwor.

¹⁰Do in, Okwe Rwot, mi kisa maki i koma iko mina ayai, tetekeny ada anyangi.

¹¹Ka jokwor na likame okuko i wia, abino ngeno be in cunyi yom i koma.

¹²Do in igagao ango pien ango atimo gikame ber, iko keta bedo i nyimi ikar kede ikar.

¹³Pak bed but Rwot, Rubanga me Isirael, ikar kede ikar. Amen! Amen!