Read kumam Sabuli 44 Bible Online

Sabuli 44 - kumam bible

Sabuli 44

¹Wan otieko winyo kede yit wa, Okwe Rubanga, joakwari wa owaco ne wa tice kame in itimo i kare gin, i kare kasek.

²In bin iriamo atekerin apat kede twer nin, do iko mino jo nin osipakin i lobo gi; imio atekerin apat oneno can, do iko mino jo nin bero.

³Pien likame bin gin kimao lobo nono kede epima gin, doko da likame kiloo kede twer gin, do pi twer kede teko nin, kede pi lero me tie nin kede gi; pien cunyi oudo yom i kom gi.

⁴In ibedo Abaka kede Rubanga na, bin in imio jo me Isirael olo yi.

⁵In en imio wa ojwango jokwor wa, nyingi en komio wan onyonyono jo kame yi kede wa.

⁶Pien likame ango aketo gen na i kom tir me emal, doko da likame epima karuno laka.

⁷Do in en kame ilako wa ki cing jokwor wa, iko mino jo kame dagi wa lewic.

⁸Wan owakere pi Rubanga nakanaka, doko obino pako nyingi ikar kede ikar.

⁹Do nan in itieko dagi wa iko mino wa lewic, doko likame ioto bobo kede isirikalen wa i yi.

¹⁰In iweko jokwor wa omio wa owilun, jokwor wa oko yako jamini wa.

¹¹In imio wa odoko cal bala romini me angola, iko sasaro wa i diere me atekerin apat.

¹²In icato jo ni pi gimoro akony akonya, kom likame ingolo wel amalo da.

¹³In imio wa odoko gi me ayet but jokio wa, odoko do gi me ayama kede me acae but jo kame oluko wa.

¹⁴Imio wa odoko do kop me ayama i diere me atekerin apat; gi me anyera me jo.

¹⁵Atie kede lewic ceng yuluyul, lewic opong i wanga

¹⁶pi kope kame jo ayeyeto ango kede jo kame caa waco, kede pi jokwor na kede jo kame mito timo onyanga i koma.

¹⁷Magi dedede otieko poto i kom wa, do likame wi wan owil kede in, doko da likame oturo isikan kame itimo kede wa.

¹⁸Wan likame okwanyo cuny wa tenge kibuti; doko da likame oweko lubo yongayo nin,

¹⁹akadi bed bala in inyinyito wa i kabedo me ikween, iko umo wa kede colpiny acucucuc.

²⁰Ka koto di oudo wi wan owil kede Rubanga wa, arabo ka koto oudo otango cing wa woro rubanga moro ace,

²¹mam koto Rubanga ongeo? Piento en engeo mung me cuny jo.

²²Kotie neko wa piny yuluyul piri, kotero wa bala romini kame koyaro ngongolo.

²³Cei do! Pinyo komio itie nino anina, Okwe Rwot? Cei, kur iuc wa tenge atwal.

²⁴Pinyo komio ikano ne wa wangi? Pinyo komio wi owil kede can kede raco kame kotie timo ne wa?

²⁵Pien korereto wa piny i apua; obuto piny lala.

²⁶Yai do, bia ikony wa. Lak wa pi amara ni kalikame lokere.