Read kumam Sabuli 47 Bible Online

Sabuli 47 - kumam bible

Sabuli 47

¹Bapunu cingu wun jo dedede; lelunu but Rubanga kede dwan amalo me were me yomcuny.

²Pien Rwot Ngamalo Twal poore alwora, en abaka adwong me wi lobo lung.

³En eketo jo dedede i loc wa, eko mino wa pugo atekerin apat.

⁴En eyero ne wa lobo kame nan obedo merwa, manoni obedo ewaka ka Yakobo ngat kame en emaro.

⁵Rubanga oyito i kom mere me ajakanut di jo lelemo kede yomcuny, en eyito di jo kuto agwara.

⁶Werunu were me pako Rubanga, werunu were me pak; werunu were me pako abaka wa, werunu were me pak.

⁷Pien Rubanga en abaka me wi lobo lung, werunu were me pake kede sabuli.

⁸Rubanga en abaka kame pugo atekerin dedede; Rubanga bedo i kom mere kacil me ajakanut.

⁹Jotel me atekerin apapat tie cokere karacel kede jo ka Rubanga, en Rubanga ka Aburaam. Pien joteko kame gwoko wi lobo obedo me ka Rubanga, en ngapug akalamo dedede.