Read kumam Sabuli 50 Bible Online

Sabuli 50 - kumam bible

Sabuli 50

¹Rwot Rubanga Won Twer oyamo; en elwongo jo me wi lobo cako ki tetu wokceng tuno tetu potoceng.

²En erieny ki Sion, bomba kame cil adikinicel.

³Rubanga wa tie bino, likame ebino ling alinga; mac ager tie telo nyime, kede yamo kame buko mere gwai oluke diere.

⁴En elwongo malo kede lobo pi bino neno kite kame en engolo ne kede jo mege kop.

⁵En ewaco negi be, “Cokunu jo na kame genere buta, jo kame bin otimo keda isikan di kimio giayala.”

⁶Malo tuco kakaler be Rubanga opoore, piento Rubanga kikome obedo ngangolkop.

⁷“Winyunu, wun jo na, ango abino yamo, Okwe Isirael ango abino tuco raco ni, ango en Rubanga, Rubanga wu.

⁸Likame ango atie bunano wu pi giayala wu, kede pi giayala awanga kame wun ikelunu i nyima nakanaka.

⁹Ango likame abino gamo twon moro kame wok ki miere wu, akadi diel moro kame wok ki balasan wu.

¹⁰Pien leini dedede kame tie i abum obedo mega, akadi paka doke kame tie i wi mori tutumian kede tutumian.

¹¹Ango angeo winy dedede kame por i wi yamo, doko gi dedede kame kuo obedo mega.

¹²“Koto di kec oudo oneka koto likame awaco ne wu, pien piny kede gi dedede kame tie iye obedo mega.

¹³Iparunu be ango acamo ringo me twonin, arabo amato remo me diegi?

¹⁴Miunu Rubanga giayala me pwone, doko cobunu kwongere kame itimunu but Ngamalo Twal.

¹⁵Lwonganu i kare kame itienu kede i peko, ango abino lako wu di ikounu bino mina deyo.”

¹⁶Do Rubanga waco ne ngat arac be, “Twer mene kame in itie kede me nyogao wero cik na, amoto me yamo kop i kom isikan na?

¹⁷Pien in idagi be pwonyi, doko iloko ngei ne kop nango.

¹⁸In imaro mako awotin kede ngakuwo ka ineno acel moro, doko jobedo nin obedo joadote.

¹⁹“In iyei ne dogi yamo kope areco, kede ne lebi teto kope me abe.

²⁰Nakanaka in ibedo piny yamo kope areco i kom imiegu ni; idubo nying atin ka toto ni.

²¹In ibedo timo gigi do ango abedo ling alinga; ibedo tamo be ango acal bala in. Do nan ango abunano in di atuco ni raco ni kakaler.

²²“Ketunu manoni i tam wu, wun jo kame wi wu wil kede Rubanga, aso ka li, abino nyinyilo wu abongo ngatamoro bino lako wu.

²³Ngat kame kelo na mic mere me pwoc bala giayala udo emia wor; ngat kame lubo yongayo kopoore, abino nyuto ne alako na.”