Read kumam Sabuli 58 Bible Online

Sabuli 58 - kumam bible

Sabuli 58

¹Wun jopug atek, benyo, itienu ngolo kop kakare? Benyo, ingolunu ne jo kop i yore me ateni?

²Li, cunyu tie kede iik areco; cingu timo tice kame nyuto gero i wi lobo.

³Jo areco parao cako ki yi toti gi; gin kicako timo raco geno i ceng me nywalo gi, di kiyamo kope me abe.

⁴Gin kitie kede kwir acal kede kwir me twol, kical bala emosoga koculo yite eko doko edingo,

⁵mio likame etwero winyo dwan ngat kame wero wer kame babango twole, arabo me ngatim tangu me twole i yore me rieko.

⁶Tuturo lak inguon atino nogi, Okwe Rubanga; puputo lak gi ki dog gi.

⁷Mi gi kirweny wir bala pii kame jwire mol tenge; mi gi kiner bala lum kame konyonyono.

⁸Mi gi kibed bala okamekame amol paka tiek kame etie liao; mi gi kibed bala atin kame konywalo di etieko to, di likame eko bilo neno wang ceng.

⁹Tiekaro gi awakawaka kalamo kite kame agune wu susunyo dop kede ka komoko negi mac kede okuto.[3]

¹⁰Jo kopoore bino lelo ka kineno di kotimo onyanga i kom jo areco; gin kibino lwoko tien gi kede remo me jo areco.

¹¹Jo bino waco be, “Ateteni, jo kopoore udo giamia me pwoc; ateteni Rubanga kame ngolo kop tie i wi lobo.”