Read kumam Sabuli 60 Bible Online

Sabuli 60 - kumam bible

Sabuli 60

¹ Okwe Rubanga in itieko dagi wa, itieko tuturo kateko wa; ibedo ger kede wa, do nan dwok wa do buti.

²In itieko mino lobo oyangere, imie ebabarun eko dong twolo; mwomwono do kakobabarun nogo, pien etie etagataga.

³In imio jo ni obeo i can atek; manono obedo ne wa bala bwini akec kame omato di oko donyo gete.

⁴In itieko sipo imendera pi kwenyaro jo kame wori, tetekeny kisobolo bwot ki leb emal.

⁵Riei cingi me teko iko mino wa oloi yi, doko gam kwac wa, tetekeny ilak jo kame in imaro.

⁶Rubanga ocikere i kabedo mere kacil be, “Abino popoko Sekem di atie kede ilel, abino da popoko aditot me Sukot.

⁷Gilead obedo mera, Manase da obedo mera; Epuraimu obedo ocoro atek kame gwoko wia, Yuda en ebela na me pug.

⁸Do abino tic kede Moab bala kalaya na me bol; abino uco amuka na i kom Edom pi bedo gikame nyuto be en mera; abino ikuk i wi Pilistia pi lone.”

⁹Okwe Rubanga, ngai kame bino tera i bomba kame kocelo kede apama atek? Ngai kame bino tela tera Edom?

¹⁰Ateteni mam in itieko dagi wa? In likame do iupere kede isirikalen wa ot yi.

¹¹Okwe kony wa i kom jokwor wa, pien kony kame dano mio kony mere li.

¹²Ka Rubanga tie kede wa, wan obino lono; en kame ebino nyono jokwor wa piny i tiene.