Read kumam Sabuli 66 Bible Online

Sabuli 66 - kumam bible

Sabuli 66

¹Wun jo dedede me lobo, wongunu kede ilel but Rubanga;

²werunu wer kame kelo deyo i nyinge; mienu pak me deyo.

³Wacunu ne Rubanga be, “Gikame in itimo tie me aura twatwal! Pien pi twer nin adwong, jokwor nin luro piny i nyimi.

⁴Jo me piny dedede wori; gin kiwero were me paki, kiwero di kipako nyingi.”

⁵Bia inenunu gikame Rubanga otieko timo, en etimo gi me aura twatwal i diere me jo.

⁶En bin eloko nam odoko kakotuo; jo oko ngolo ecilet kede tien gi. Wan oko lelo ki kuno pi en,

⁷en ngat kame epugo kede twer mere nakanaka, en ngat kame eciko wange i kom atekerin. Jo kame dagi wu miero kur wakere.

⁸Pakunu Rubanga wa, Okwe wun jo dedede, miunu wer me pake winyere,

⁹en ngat kame egwoko wa, emio wa pwodi okuo doko likame eweko tien wa ocer.

¹⁰Pien in itieko tamo wa, Okwe Rubanga; in itieko tamo wa bala kame kotamo kede nyonyo siliba kede mac.

¹¹In bin ikolo wa i bwoi; iko cibo yec apek i wi wa;

¹²iweko jo onyonyono wi wa kede asigiran; obeo i mac kede i pii; do in nataman itieko kelo wa i kabedo kame lac.

¹³Ango abino bino i odi kede giayala awanga; abino mini gikame acikere iye.

¹⁴Abino mini gikame doga oudo owaco di ako cikere iye i kare kame oudo atie kede i peko.

¹⁵Abino mini giayala awanga kocwe, kede yiro kame duny yai ki kom romini kame owango i wi alutari; abino yali kede twonin kede diegi.

¹⁶Bia iwinyunu, wun jo dedede kame lworo Rubanga, di ango ako bino tatamo ne wu gikame en etieko timo nango.

¹⁷Ango oudo akok bute kitek, di leba oko pake kede were.

¹⁸Ka koto oudo ayei ne dub bedo i cunya, koto oudo Rwot likame owinyo koko na.

¹⁹Do ateteni Rubanga otieko winya; en etieko winyo ilega na.

²⁰Ango apako Rubanga, piento en likame edagi ilega na doko da likame ekwanyo amara mere kalikame lokere ki koma.