Read kumam Sabuli 69 Bible Online

Sabuli 69 - kumam bible

Sabuli 69

¹Okwe Rubanga, laka, pien pii do otieko tuno i nguta.

²Atie lwiny i cwoto atut, kakame kacungo li kiye; atieko tuno i pii atut, pii amol do dipere beo i wia.

³Aol kede koko; dwana otuo. Wanga da do odoko col pi kuro Rubanga na.

⁴Jo kame daga nono nono abongo kop moro tot kalamo wel me yer wia; jo kame mito neka tot, gin jokwor na kame cuko na kop. Benyo, mam ango miero nan adwok gi kalikame akwalo?

⁵Okwe Rubanga, in ingeo mingo nango; dub kame ango atimo, likame okanere kibuti.

⁶Pi ango, kur imi lewic mak jo kame geni, Okwe Rwot Rubanga me jo yi; kur imi cai jo kame moi pi ango, Okwe Rubanga me Isirael!

⁷Ango abedo kanyo ayet piri, lewic otieko pong i wia.

⁸Atieko doko bala dano apat i diere me joawade na, ngakumbor i but idwe ka toto na.

⁹Nyeko na me amara pi odi liel i cunya bala mac; ayet kame jo yeti kede opoto i koma.

¹⁰Kakame bin amwolere kede di akanyo kec, jo oko yeyeto ango pi timo kamanono.

¹¹Kakame angapo kede egoe me iturur, ako doko gi me ayama gi.

¹²Ango adoko gi me akwota kibut jo kame bedo i erute, doko joamera da teto were i koma.

¹³Do ango gira akelo kwac na buti, Okwe Rwot. Okwe Rwot, pi amara nin adwong kalikame lokere, gam koko na i kare kame poore. Pi kony nin kame genere

¹⁴laka kur alwiny i cwoto; laka ki cing jokwor na kede ki pii atut.

¹⁵Kur iwek pii amol dipere bei iwia, arabo kakatut lwinya, amoto ates mwonya.

¹⁶Gam kwac na, Okwe Rwot, pien amara nin kalikame lokere ber; lokere buta pi cuny me kisa nin adwong.

¹⁷Kur ilok wangi tenge kibut ngatic nin, pien atie i can, susunyo gamo kwac na.

¹⁸Nyikini di iyapiyapi keda, laka, laka ki cing jokwor na.

¹⁹In ingeo kite kame koyeyeto ango kede, kede lewic kede acae kame audo; in ingeo jokwor nango dedede.

²⁰Ayet otieko dubo cunya, omio do ali kede gen. Oudo amo ngatamoro be amoto koto kisa omake i koma do likame ako udo; doko amo ngat kame koto kwei cunya, do likame ako udo.

²¹Akaka mina cam gin kimia poison, doko di orio oudo oneka, gin kimia bwini awac pi mato.

²²Mi ebaga gi lokere dok obek me mako gi, mie edok bala owic ne jo kame gango gi.

²³Mi wang gi dok col tetekeny kur kikaruno neno piny, doko mi pier gi bed di ogom nakanaka.

²⁴Nyut gero ni i kom gi; pi gero nin aliet, riam gi paka mako gi.

²⁵Mi miere gi dong nono abongo jo; kur imi ngatamoro dong i kimere gi.

²⁶Pien gin kitidilo jo kame in itieko keto can i kom gi, doko pwodi kimeede suro jo kame in itieko mino awanon.

²⁷Meede ameda maro raco gi i wi raco; kur iwek gi aweka ki raco go.

²⁸Kwany nying gi tenge ki itabu me jo akuo; kur imi rwak nying gi i kom nying jo kopoore.

²⁹Do ango atie neno can doko atie kede lito; Okwe Rubanga, laka iko tinga malo.

³⁰Ango abino pako nying Rubanga kede wer; abino mine dwongo kede pwoc.

³¹Manoni bino yomo cuny Rwot kalamo mine etobait, kalamo akadi mine twon ati kame tie kede tunge kede abelekek.

³²Mi jo kame kotie tero kirac nen manono di cuny gi ko bedo yom; wun jo kame imounu Rubanga, miunu cunyu dwogi.

³³Pien Rwot winyo koko me jocan, doko likame ecao jo mege kame kotweo.

³⁴Wek malo kede piny pake, name kede gi dedede kame kuo kame tie i yi gi da pake.

³⁵Pien Rubanga bino lako Sion di eko bobo medo gero bomban me Yuda; di jo mege ko bino bedo kuno, di kanono ko doko mergi;

³⁶ebino doko me idwe ka jotic mege, doko jo kame mare bino bedo iye.