Read kumam Sabuli 7 Bible Online

Sabuli 7 - kumam bible

Sabuli 7

¹Okwe Rwot Rubanga na, in en karingo na me gwok, laka kibut jokwor kame tie wapo yora iko mina abwoti,

²aso ka li, gin kibino nyinyilo ango bala engu; kibino wana tera tenge abongo ngatamoro kame romo konya.

³Okwe Rwot Rubanga na, ka atimo gigi, ka cinga otimo ne ngatamoro raco,

⁴ka aculo ngawota kede timo ne raco, arabo ka ayako ngakwor na abongo tien kop moro,

⁵mi ngakwor na wapa paka maka; ereta piny di eko neka, di eko weka di abuto piny i lobo abongo kuo.

⁶Okwe Rwot, yai kede gero, yai iko yi kede jokwor kobino na kede lieto. Yai do, Okwe Rubanga, pien in imito kop kame kongolo kakare.

⁷Mi jo me atekerin dedede cokere luki, di in iko pugo gi di ibedo i kabedo me malo.

⁸Rwot ngolo ne jo dedede kop; ngol na do kop kiber, Okwe Rwot pien ango apoore, doko da ali kede raco moro.

⁹Mi raco me jo areco jiki, do mi jo kopoore dok tek, in Rubanga kopoore, in itwero poko ngeno tam me jo kede gikame tie i cuny gi.

¹⁰Rubanga en ebuku kame gwoka, en elako jo kame cuny gi opoore.

¹¹Rubanga en ngangolkop kame ngolo kop i ateni, en Rubanga kame tie kede gero i kom jo areco ceng dedede.

¹²Ka dano moro likame oswilaro, Rubanga bino peno epima mere doko bit, en etieko kudo yat me emal eko peno tol mere,

¹³en etieko iiko jamini areco me yi, eketo gikame liel mac i leb imalia mege.

¹⁴Neningo kite kame kitie iiko kede tam areco, cuny gi opong kede iik areco kede tim me angalo.

¹⁵Gin kikunyo bur atut, do gin nogo ken gi kiko popoto i bur kame kikunyo.

¹⁶Iik gi areco dwogo i wi gin nogo, doko da tim gi me gero dwogo i wi gin nogo.

¹⁷Ango gira abino pwono Rwot piento en epoore, doko abino pako nying Rwot, en Ngamalo Twal.