Read kumam Sabuli 72 Bible Online

Sabuli 72 - kumam bible

Sabuli 72

¹Okwe Rubanga, mi abaka ngolo kop i ateni bala in, doko da mi wot ka abaka bed di epoore bala in.

²Miero epug jo nin i yore kopoore, doko epug jocan i yore me ateni.

³Mi mori kede imukuran kel ne jo lonyo, pien gin kipoore.

⁴Poore abaka ngol kop ne jocan i yore me ateni, poore elak jo kame li kede gimoro, di eko bwono jo kame tero gi kirac.

⁵Mi ajakanut mere bed nakanaka bala ceng, ebed nakanaka bala duwe, ebed tie pi kare lung.

⁶Mi abaka bed cal bala kot kame cwei i lum kame kodao, ebed cal bala kot kame bido lobo.

⁷Mi kuo kopoore nyai i kare mere, doko mulem adwong bed tie nakanaka bala duwe.

⁸Mi ajakanut mere cakere ki nam adwong i tetucel me piny tuno kede i nam adwong kame tie tetu ocelu me piny, doko ecakere ki ecilet me Eupurate tuno i ajikini me lobo.

⁹Mi jokwor mege lur piny i nyime, doko jokwor mege riebere piny i apua i nyime.

¹⁰Mi abakai me Tarusi kede me jo abedo i cula cul esolo gi bute, doko abakai me Sieba kede Seba kel ne giamia.

¹¹Abakai dedede miero riebere piny i nyime, doko atekerin dedede miero tim ne tic.

¹²Piento en elako ngat kame mito kony kame elwongere bute, ekonyo ngacan kede ngat kame li kede ngakonye.

¹³En kisa make i kom jo agoro kede jocan, doko elako kuo me jocan.

¹⁴En elako kuo gi ki cing jo kame tero gi kirac, kede ki cing jogero; doko remo gi lit ki wange.

¹⁵Miero abaka bed kuo nakanaka! Miero mie saabu me Sieba. Poore jo bed lego pire nakanaka, di jo lamo ne winyo piny yuluyul.

¹⁶Mi cam bed tot i lobo; mi kodere dongi di kiko umo wi imukuran, di kiko nyak bala me Lebanon; doko mi jo pong i bomban bala lum me itela.

¹⁷Mi nying abaka bed tie nakanaka, iruo me nyinge meede ameda bedo nakanaka bala ceng. Mi atekerin dedede ud winyo pire; mi gi kilwonge be ngawinyo.

¹⁸Pak bed but Rwot, Rubanga me Isirael, ngat kame en kene etimo jamini me aura.

¹⁹Pak bed i nyinge me deyo nakanaka; deyo mere pong i lobo lung. Amen! Amen!

²⁰Ilega ka Daudi wot ka Yese jik kan.