Read kumam Sabuli 74 Bible Online

Sabuli 74 - kumam bible

Sabuli 74

¹Okwe Rubanga, pinyo komio iuco wa atwal atwala? Pinyo komio itie kede gero i kom romini kame itie kwano?

²Yutuno jo ni kame oudo iyero riki sek, jo kame oudo in ilako pi bedo jo ni obe. Yutuno moru me Sion, kakame in bin ibino bedo iye.

³Bia ber ineni kakame kodudubo atwal atwala; jokwor otieko dudubo gi dedede kame tie i kabedo kacil.

⁴Jokwor nin okuko i kabedo nin kacil; kisipo imenderan gi kuno bala gianyuta me bwono yi.

⁵Ineno gi bala jo kame tongo yen, jo kame tie tongo yen i abum kede le.

⁶Gin kibebelo ibaon kame kopao kiber kede enyondo kede le.

⁷Gin kitieko cwinyo kabedo nin kacil; kimunao kabedo kame kowori kiye.

⁸Gin oudo kiyamo ken gi ken gi be, “Otiekarunu gi atwal”; gin kiko wango kabedere dedede kame koworo kiye Rubanga i piny wa.

⁹Wan likame otie neno gianyuta wa me imendera; enabi moro da likame bobo tie, doko likame tie ngatamoro i diere wa kame ngeo kare kame can nono bino tieko.

¹⁰Okwe Rubanga, jokwor bino bedo kede acae buti paka tuno awene? Benyo, jokwor bino meede yeyeto nyingi nakanaka?

¹¹Pinyo komio itie giri neno anena abongo timo gimoro; pinyo komio idolo giri badi adola?

¹²Do di in Rubanga ibedo Abaka na cako sek, ibedo timo tice me alako i wi lobo.

¹³In ipoko nam i diere pi twer nin; in iko nyinyito wi twole kiyiliyili kame bedo i pii.

¹⁴In inyinyito wi Lebiatan;[4] in imie but leini me wi tim pi came.

¹⁵In iyabo wen ataneko kede isamai; imio icileta kame oudo mol nakanaka odwono.

¹⁶Iceng obedo meri, iwor da obedo meri; iketo duwe kede ceng i kabedere gi.

¹⁷In itieko cibo apokini me lobo; icweo kare me ngico kede kare me oro.

¹⁸Yutuno, Okwe Rwot, epone kame jokwor tie kede acae buti, jomingo nogi yeyeto nyingi.

¹⁹Kur ijal kuo me jo ni i cing leini ager; kur imi wii wil kede jo ni kame can odio.

²⁰Yutuno isikan ni, pien tim me gero tie i kabedere acol dedede me piny wa.

²¹Kur imi lewic mak jo ni kame kotie tero kirac; mi jocan kede jo kame piny oloo pak nyingi.

²²Yai, Okwe Rubanga, iko mino pido ni; kur imi wii wil kede epone kame jomingo cai kede ceng dedede.

²³Kur wii wil kede redo me gero me jokwor ni, kede icelakin gi kame meede ameda.