Read kumam Sabuli 78 Bible Online

Sabuli 78 - kumam bible

Sabuli 78

¹Wun jo na, winyunu pwony na, cikunu yitu i kom kope me doga.

²Abino yamo i agole; abino gonyo dwong me kope mogo me mung me kare kasek,

³gikame wan owinyunu, doko ongeunu gi, gikame joakwari wa owaco ne wa.

⁴Wan likame obino mungo gi ne ikwae wa; obino waco ne lwak me kare me anyim kop me tice adongodongo kame Rwot otimo, karacel kede twer mere, kede giaura kame en etieko timo.

⁵Riki en emio cik but ikwae ka Yakobo; emio iswilia but jo me Isirael. En eko ciko joakwari wa pi pwonyo idwe wa iswilia nogo,

⁶tetekeny lwak me kare me anyim, idwe kalikame pwodi konywalo, karuno bino ngeno gi di gida kiko tatamo ne idwe gi.

⁷Manoni bino mino gi kiketo gen gi i kom Rubanga; di likame wi gi ko bino wil kede tice mege, do kibino gwoko cik mege.

⁸Likame gin kibino bedo bala joakwari gi, lwak kame joepali kede kame jojemo, lwak kalikame oudo cuny gi osipakin di tek geno Rubanga, jo kalikame oudo genere bute.

⁹jo Epuraimu oudo omako imalia gi, gin kiko wilun ringo cen i ceng me yi.

¹⁰Gin likame kigwoko isikan kame Rubanga otimo kede gi; kidagi lubo iswil mere.

¹¹Wi gi owil kede gikame oudo etimo, kede giaura kame oudo enyuto negi.

¹²En bin etimo tice me aura i nyim joakwari gi i lobo me Misiri, i elet me Soan.

¹³En emio nam opokere i diere di gin kiko ngolo, eko mino pii ocokere ikumemei bala atukit.

¹⁴Etelo gi kede edou iceng, do eko telo gi kede asara me mac iwor kiakia.

¹⁵En emio lela obarere i tim, eko mino gi pii atot kame wok ki kakatut.

¹⁶Emio pii omol di wok ki lela, di eko mino pii omol piny bala icileta.

¹⁷Do di gin kiko meede ameda dubo bute, gin kijemo ne Ngamalo Twal i tim.

¹⁸Kitamo Rubanga i cuny gi, di kipenye cam kame cuny gi mito.

¹⁹Gin kibedo kede yamo arac i kom Rubanga di kiwaco be, “Benyo, Rubanga twero mino wa cam i tim kan?

²⁰Akadi bed bala en ejwato lela di pii oko kukunya, di eko mol, benyo, etwero da mino mugati, arabo mino jo mege ringo?”

²¹Aso, kakame Rwot owinyo kede kop noni, cunye oko wang, eko suro jo me Isirael kede mac, di wang cunye but gi oko meede ameda,

²²pien gin oudo likame kitie kede yei i kom Rubanga, doko oudo likame kigeno twer mere me lako jo.

²³Akadi bed kamanono da, en riki eyamo di eciko malo, eko yabo ikekon me malo;

²⁴en bin emio emanu ocwei negi me acama; oudo emio gi engano kowok ki malo.

²⁵Jo ajoa ocamo mugati kame imalaikan camo, Rubanga ocwao negi cam di tot.

²⁶En bin emio yamo me tetu kide obuko ki malo, kede twer mere en bobo eko mino yamo me tetu piny obuko.

²⁷En bin emio ringo ocwei i kom gi bala apua; emio jo winy atot bala asinge me nam.

²⁸Emio winy nogo opopoto piny i dier kimere gi, i kabedo lung kame gin oudo kibedo iye.

²⁹Gin kiko cam di kiko yeng kiber, piento en emio gi gikame cuny gi oudo mito.

³⁰Do di pwodi likame kicobo mit gi me yengo, di oudo pwodi cam tie i dog gi,

³¹gero oko mako Rubanga i kom gi; eko neko jo atek i diere gi, awobe abeco me Isirael.

³²Akadi bed kamanoni da, gin pwodi kiko meede kede dub; gin likame kiyei tice mege me aura.

³³Aso en eko mino ceng me kuo gi obunyo tiek bala wei; mwakini me kuo gi ongoole tiek kede peko.

³⁴Tek kame en oudo eneko gi, gin oudo kiko donyo mone; gin oudo kiswilaro di kiko donyo mono Rubanga kede cuny gi lung.

³⁵Gin oudo kiyutuno be Rubanga en lela gi, Rubanga Ngamalo Twal oudo obedo ngalak gi.

³⁶Do dog gi oudo waco ne kope me abe, leb gi obedo cuko kop me abe i nyime.

³⁷Cuny gi oudo likame osipakin i kome; likame kigwoko cikere me isikan kame en etimo kede gi.

³⁸Do akadi da, pi kisa mere en eko sasiro dub gi, likame eko muducaro gi. I kare atot en ebedo didio gero mere, likame eko jalakino lilo mere dedede.

³⁹En bin eyutuno be kom gin kibedo jo ajoa, kical bala yamo kame buko eoto di likame bobo eko dwogo.

⁴⁰Gin bin kijemo ne Rubanga i tim tien atot, gin kiwango cunye i kuno.

⁴¹Gin kibedo tamo Rubanga tien kede tien, kiko wango cuny Ngat Kacil me Isirael.

⁴²Wi gi bin owil kede twer mere, akadi kiton ceng kame en elako gi kede kibut jokwor gi;

⁴³kakame en etimo kede gianena mege i Misiri, kede giaura mege i elet me Soan.

⁴⁴En bin eloko icileta gi odoko remo, tetekeny kur kimat pii me isamai gi.

⁴⁵Ecwao negi alule me lwangini, kame oko donyo kakao gi. Doko da ecwao negi igwalogwalon, kame oko dudubo lobo gi.

⁴⁶Emio kudilinge odudubo cam me poti gi, obonyo da oko camaro gikame gin kilole puro.

⁴⁷Emio akako odudubo olok gi, kede ngico oko dudubo cukamori gi.

⁴⁸Ejalo doke gi akako oneko, kede epie da oko gwegweo romini gi.

⁴⁹Bin ejalakino twon gero mere kede can alit i kom gi, kame imalaikan kame dudubo okelo.

⁵⁰En likame edidio gero mere; likame emio gi kibwot ki to, do ejalo kuo gi ne aumpuli.

⁵¹En eneko idwe kao dedede i Misiri, kame obedo anyakini me agege me teko gi i eema ka Kam.

⁵²Di eko telo jo mege wok ki kuno bala romini; eko donyo leko nyim gi i tim bala esipan me romini.

⁵³En etelo gi abongo peko moro, omio likame kiko bedo kede lworo; di pii me nam oko mwonyo jokwor gi.

⁵⁴En eko tero gi i moru mere kacil, moru kame en eyi eko mano kede teko mere.

⁵⁵En eriamo atekerin apat kame oudo tie i nyim gi, di eko popoko ne jo me Isirael lobo nono pi bedo mergi, eko mino ateker me Isirael obedo i miere me jokwor gi.

⁵⁶Do gin kiko tamo Rubanga Ngamalo Twal kiko jemo ne. Gin likame kilubo cik mege,

⁵⁷do kilokere tenge kiko bedo abongo yei bala bin joakwari gi, kibedo mienere amiena bala yat kogom me gweno emal.

⁵⁸Pien gin oudo kiwango cunye, omio en eko doko ger pi kite kame kigero kede abilan me woro caljwogi; kimio nyeko omake kede caljwogi kame gin oudo kitimo.

⁵⁹Kakame Rubanga ongeo kede, gero oko make twatwal, di eko dagi jo me Isirael atwal atwala.

⁶⁰Rubanga oko weko kabedo mere kame oudo tie Silo, eema kame en oudo ebedo iye i diere me jo,

⁶¹eko jalo kotero Sanduku me Isikan, kame oudo nyuto twer mere, di eko jalo deyo mere i cing jokwor.

⁶²Ejalakino gero mere i kom jo mege, eko mino koneko gi kede epima.

⁶³Mac ocamaro awobe gi, manoni oko mino anyira gi oko bedo abongo jo kame nyomo gi.

⁶⁴Bin koneko josaseredoti gi kede epima, di likame apuserun gi oko koko gi da.

⁶⁵Di Rwot oko lepun, ineno bala ecei ki wang nino, ineno bala ngayi kame tie redo pien emer kede bwini.

⁶⁶En eko mino jokwor mege omako yongayo ringo, di eko mino gi twon lewic kalikame tiek.

⁶⁷En eko dagi ikwae me ot ka Yosepu, likame eyero jo me ekeko ka Epuraimu.

⁶⁸Do en eko yero jo me ekeko ka Yuda, kede moru me Sion kame oudo en emaro.

⁶⁹Di eko gero kabedo mere kacil kame ber bala malo, di ecungo kingiking bala acakini me lobo kame en etieko cibo pi kare lung.

⁷⁰En eyero ngatic mere Daudi, eko kwanye ki kakwano romini,

⁷¹ekwanye ki kwano kede gwoko romini eko kete bedo abaka me jo mege me Isirael, pi bedo ngakwai jo mege, gin ikwae ka Yakobo.

⁷²Daudi oko bedo ngakwat gi kede cuny kopoore, di eko telo gi kede diru.