Read kumam Sabuli 81 Bible Online

Sabuli 81 - kumam bible

Sabuli 81

¹Werunu kede dwan amalo but Rubanga ngat kame obedo teko wa; lelemunu kede kilel but Rubanga ka Yakobo.

²Cakunu wer, yangunu ayekeyeke, gounu wer amit kede adungun kede arigirigin.

³Kutunu agwara me ebaga me por duwe, kede me duwe kame otieko dongo, gin ceng me ibagai wa.

⁴Pien manoni en iswil me Isirael, cik ka Rubanga ka Yakobo.

⁵Iswil nono bin en emio Yosepu, i kare kame bin esuro kede piny me Misiri. Awinyo ngatamoro kalikame oudo ango angeo dwane di waco be,

⁶“Ango bin akwanyo yec apek tenge ki epepet ni; ango bin atako cingi ki ebukit kame yec tie iye.

⁷Kakame bin itie kede i peko, in bin iko lwongere buta di ango ako laki; ango bin adwoko kwac ni ki mwoc me kot, en kabedo na me mung; ango bin atami i pii me Meriba.

⁸Winyunu ikwenyar na, Okwe wun jo na; Okwe Isirael, ka koto iyei winyo kop na da!

⁹Miero kur rubanga ace apat bed tie i diere wu; likame ibinunu woro rubanga moro ace.

¹⁰Ango en Rwot Rubanga nin, ngat kame bin okwanyi ki piny me Misiri. Ngam dogi di ango ako bino piti.

¹¹“Do jo na likame bin oko winyo dwana; Isirael likame bin oko yei winyo dwana.

¹²Omio bin ango ako jalo gi lubo epali kame tie i cuny gi, pi timo gikame cuny gi oudo mito.

¹³Okwe koto jo na yei winyo kop na; cunya mito twatwal be koto jo me Isirael olubo yote na!

¹⁴Di do ango koto ako bwono jokwor gi awakawaka; di do ako lokere yi kede jokwor gi.

¹⁵Jo kame dagi Rwot ko bino riebere piny i nyime kede lworo, doko alola gi ko bino bedo nakanaka.

¹⁶Ango koto apiti kede engano kame konungo twatwal, di ako mini iyeng kede mokic kame kowado ki moru.”