Read kumam Sabuli 83 Bible Online

Sabuli 83 - kumam bible

Sabuli 83

¹Okwe Rubanga, kur ilingi; kur ibed mot arabo ipalaro!

²Neningo, akadi nataman da jokwor nin tie celakino; jo kame dagi otieko kelo wi gi.

³Gin kitie kede iik me rieko i kom jo ni; kiporo kop karacel i kom jo kame in igwoko.

⁴Gin kiwaco be, “Bianu otiekunu ateker gi pitipit; tetekeny kur bobo yutuno nying Isirael atwal.”

⁵Gin kiwinyere i iik gi me mung kede cuny acel; kiribo kop i komi:

⁶gin jo me Edom kede Joisimael, jo me Moab kede jo Kagiri;

⁷jo me Gebal, Amon kede Amalek, jo me Pilistia kede jo kame bedo Taya.

⁸Jo me Asiria da otieko ribere kede gi, gin en jo kame konyo jo me Moab kede jo Amon yi, ikwae ka Lot.

⁹Tim negi bala kame bin itimo ne kede jo me Midian, kede bala kame itimo ne kede Sisera kede Jabin i nget ecilet me Kison,

¹⁰jo kame bin in imuducaro i Enedor, kame riki oko doko cal bala woyo kame tie piny.

¹¹Tim ne jodongo gi bala kame itimo kede ne Oreb kede Seeb, bwon jopug gi bala bin Seba kede Salamuna,

¹²jo kame bin owaco be, “Ogamunu elet me kwat ka Rubanga dok merwa.”

¹³Okwe Rubanga na, wewelo gi bala apua me apipiru, bala cucung kame yamo tie kuto.

¹⁴Bala kame mac wango kede abum, bala kame mac wango kede wi mori,

¹⁵kamanono ida riam gi kede yamo abuko kitek di iko mino yamo ager kel negi lworo.

¹⁶Mi lewic mak gi, Okwe Rwot, tetekeny gin kilwong nyingi.

¹⁷Wek mi gi lewic, doko inonong mak gi nakanaka; mi gi kitoi to me lewic.

¹⁸Mi gi kingei be in keni, ngat kame nyingi obedo Rwot, en kame ibedo Ngamalo Twal kame lo wi lobo lung.