Read kumam Sabuli 86 Bible Online

Sabuli 86 - kumam bible

Sabuli 86

¹Cik yiti, Okwe Rwot, di iko gamo kwac na, pien ango atie i can doko piny oloa.

²Gwok kuo na, pien ango ageni; lak epasoit ni kame geni.

³In en Rubanga na; bed kede kisa buta, Okwe Rwot, pien ango akok buti piny yuluyul.

⁴Yom cuny epasoit ni, Okwe Rwot, pien ango akelo kwac na buti.

⁵Pien in, Okwe Rwot, iber doko isasiro jo, amara ni kalikame lokere dwong but jo dedede kame kok buti.

⁶Winy kwac na, Okwe Rwot; winy koko na me ingangai.

⁷Kame atie i peko ango alwongi, pien in ibino gamo kwac na.

⁸Likame tie rubanga moro kame cal kedi, Okwe Rwot, doko da likame tie tice kame kokaruno poro kede megi.

⁹Atekerin dedede kame in icweo bino bino i nyimi di kiko wori, Okwe Rwot; gin kibino mini deyo.

¹⁰Pien in idwong doko itimo jamini me aura; in keni en kame ibedo Rubanga.

¹¹Pwonya lubo yongayo nin, Okwe Rwot, me wek alub ateni nin; mia awori kede cunya lung.

¹²Ango apwoyi kede cunya lung, Okwe Rwot Rubanga na, doko abino mini deyo nakanaka.

¹³Pien amara nin kalikame lokere dwong buta; in itieko lako kuo na ki kabedo me jo oto.

¹⁴Joewaka tie momoo kop i koma, Okwe Rubanga; ekodet me jogero mito neka, doko likame kiparo piri akadi acel.

¹⁵Do in, Okwe Rwot, ibedo Rubanga kame timo jo kisa doko itimo mwolo; in cunyi likame susunyo wang, doko amara nin kalikame lokere kede genere nin dwong twatwal.

¹⁶Lokere buta di iko bedo kede kisa i koma; mi epasoit ni teko; lak atin me apasoit ni.

¹⁷Mia gianena moro kame nyuto bero ni, me wek jo kame daga neni di lewic ko mako gi, pien in, Rwot, itieko konya di iko kweno cunya.