Read kumam Sabuli 88 Bible Online

Sabuli 88 - kumam bible

Sabuli 88

¹Okwe Rwot, Rubanga ngalak na, iceng ango akok buti pi konya; iwor da ango akok i nyimi,

²wek ilega na tun buti; cik yiti iwiny koko na.

³Pien peko opong i kuo na, doko kuo na odoko iyapiyapi kede kabedo me jo oto.

⁴Ango komara do i kom jo kame tie ot kabedo me jo oto; teko na otiek.

⁵Acal do bala jo kame kojalo i kom jo kame tie donyo i ates, bala jo kame koneko, kame tie do buto i ates, bala jo kame wii otieko wil kede gi atwal, pien gin do likame kitie i cingi.

⁶In itieko rwaka kakatut i ates, kabedo kame col di tut.

⁷Lilo ni onua, doko ibwona kede ebuka me lilo ni dedede.

⁸In itieko mino joaupa na olworo bedo keda; in itieko mina adoko gikame neno rac i but gin. Kotieko cega omio likame akaruno bwot;

⁹wanga odoko mwadamwada pi can kame atie neno. Okwe Rwot, ceng dedede ango alwongere buti; atango cinga buti.

¹⁰Benyo, in itimo giaura ne jo oto? Benyo, gin kiyai malo di kiko paki?

¹¹Benyo, kotatamo amara nin kalikame lokere i ates, arabo kotatamo genere nin i kabedo me amuducar?

¹²Benyo, giaura nin kongeo i kakacol kuno, arabo kotatamo genere nin i kabedo me jo kame wic otieko wil kede gi?

¹³Do ango akok buti, Okwe Rwot; ceng dedede odiko ango akelo kwac na i nyimi.

¹⁴Okwe Rwot, pinyo bo komio iuca tenge? Pinyo komio ikana na wangi?

¹⁵Cako di pwodi ango atitidi, abedo neno can kame abwot abwota kede to, aneno can kame in imia; adoko do goro.

¹⁶Lilo nin otieko bwona; asura nin areco omuducaro ango.

¹⁷Gin kiluka piny yuluyul bala ariram me pii; kibino na di kigurao ango ki bad dedede.

¹⁸In itieko mino adiereson na karacel kede jokio na olworo bedo keda; colpiny en kame do tie bala ngabedo na.