Read kumam Sabuli 89 Bible Online

Sabuli 89 - kumam bible

Sabuli 89

¹ Okwe Rwot, ango abino wero nakanaka wer me pako amara nin kalikame lokere; abino tatamo genere nin kede doga but lwak me kare lung.

²Ango angeo be amara nin kalikame lokere tie nakanaka; genere nin tie kingiking bala malo.

³In bin iwaco be, “Ango atieko sikano kede dano na kame ayero, ango atieko lairo but epasoit na Daudi be,

⁴‘Abino mino ikwae ni bedo tie nakanaka, di ako bino mino ajakanut ni bedo tie i kare lung.’ ”

⁵Wek gi dedede kame tie i malo pak giaura kame in itimo, Okwe Rwot, doko miero pak genere nin i kacokere me tipere kacil.

⁶Pien ngai en kame kokaruno poro kede Rwot i malo? Ngai kikom tipere kacil me i malo en kame cal bala Rwot,

⁷Rubanga kame kolworo kitek i kansulo me tipere kacil, ngat kame pire dwong, doko kame kolworo kalamo gin dedede kame kiluke?

⁸Okwe Rwot, Rubanga me jo yi, ngai kame tek bala in, Okwe Rwot? In igenere i gi dedede.

⁹In ipugo gero me nam; ka ebuka mege tingere, in ikweo gi.

¹⁰In bin inyonyoto Rakab[6] bala gi oto; isarakino jokwor ni kede teko ni.

¹¹Malo obedo meri, piny da meri; piny kede gi dedede kame tie iye in en kame icweo.

¹²Tetu malo kede tetu piny in kame icweo; Tabor kede Kerimon paki kede kilel.

¹³In itie kede twer adwong; teko nin dwong, in itie kede twer amalo twatwal.

¹⁴Poore kede ngolo kop i ateni en kame obedo acakini me ajakanut nin; amara kalikame lokere kede genere en kame telo nyimi.

¹⁵Kitie kede yomcuny gin jo kame kingeo paki kede dwan amalo, jo kame bedo i lero me tie nin, Okwe Rwot.

¹⁶Gin kilelo piri piny yuluyul, di kipaki pi poore nin.

¹⁷Pien in en kame ibedo teko kede deyo gin; bero nin en kame mio wan teko.

¹⁸Pien ebuku wan obedo me ka Rwot, abaka wa obedo me ka Ngat Kacil me Isirael.

¹⁹Di do in bin iko waco i gianyuta ne jo ni kame geni be, “Ango atieko keto ocoro me ajakanut i wi dano kame tie kede twer, atieko tingo malo dano kame ango ayero kikom jo.

²⁰Ango atieko udo ngatic na Daudi; atieko wire kede mo na kacil.

²¹Teko na bino bedo kede en nakanaka; twer na bino mine ebedo tek.

²²Likame tie ngakwor kame bino karuno en, jo areco likame bino bwone.

²³Ango abino nyonyoto jokwor mege i nyime, di ako neko jo adage.

²⁴Genere na kede amara na kalikame lokere bino bedo i kome; pi twer nango teko mere bino meede ameda.

²⁵Ango abino mino twer mere meede paka tuno i nam, doko i tetucel, twer mere bino tuno i icileta.

²⁶En ebino koko buta be, ‘In en ibedo papa na, Rubanga na kede lela kame laka.’

²⁷Ango abino mine ebedo bala atin kao na, abaka kame lo abakai dedede me wi lobo.

²⁸Abino bedo kede amara na kalikame lokere i kome nakanaka, doko isikan nango kede en bino cungo di tek.

²⁹Abino mino ikwae mege en kame bedo i ajakanut nakanaka, doko abino mino kom me ajakanut mere bedo nakanaka bala malo.

³⁰“Ka idwe mege odagi lubo iswil nango di kiko dagi bedo bala kame cik nango mito,

³¹ka gin kituro iswil nango di likame kiko lubo cik na,

³²ango abino do dano gi kede ebela pi turo iswil, doko abino dano gi kede iyera pi dub;

³³do likame abino kwanyo amara na kalikame lokere ki kom Daudi, arabo bedo kede angalo i genere na.

³⁴Likame abino turo isikan na, arabo loko kop kame atieko waco ne.

³⁵“Ango atieko lairo kede nyinga kacil tien acel atwal; likame abino ngalo Daudi.

³⁶Ikwae mege bino bedo i ajakanut nakanaka, doko ajakanut mere bino bedo tie i nyima nakanaka bala ceng.

³⁷Ebino bedo tie nakanaka bala duwe, en mujura kame tie malo i edou nakanaka.”

³⁸Do nan in itieko jale doko itieko dage; lilo otieko maki kitek i kom abaka kame in iyero.

³⁹In itieko turo isikan kame oudo itimo kede ngatic ni; doko itieko uco ocoro mere me ajakanut piny i apua.

⁴⁰In itieko tuturo apama kame luko bomba mere; itieko mino kateko mere odoko ameje.

⁴¹Jo dedede kame beo i ngete yake; en etieko doko gianyera me jokio mege.

⁴²In itieko mino jokwor mege teko me bwone; in itieko mino jokwor mege dedede olelo.

⁴³Aso di in itieko mino epima mere odoko okuku, doko in likame ikonye yi.

⁴⁴In itieko mano ebela mere me pug[7] doko iremoro kom mere me ajakanut ireto piny.

⁴⁵In itieko mine eti awakawaka; doko imio lewic obwone.

⁴⁶Pi kare kame rom amene, Okwe Rwot? Mam do iyaro bedo pwono nakanaka? Lilo nin bino liel bala mac paka tuno awene?

⁴⁷Yutuno ekite kame kuo nango cecek kede; yutuno be in icweo dano pi bedo gikame to.

⁴⁸Ngai kame karuno bedo kuo di likame eko to? Ngai kame karuno bwot ki twer me kabedo me jo oto?

⁴⁹Rwot, amara nin kalikame lokere me kare asek ca do tie tuai, amara kame pi genere nin omio iko kwongere but Daudi.

⁵⁰Yutuno, Okwe Rwot, ekite kame koyeyeto kede epasoit ni; ekite kame ango akanyo kede ayet me atekerin.

⁵¹Ayet kame jokwor ni yeta kede, Okwe Rwot, ayet kame koyeto kede abaka kame in iyero, i kabedo dedede kame en ebeo iye.

⁵²Pak bed but Rwot nakanaka. Amen! Amen!