Read kumam Sabuli 90 Bible Online

Sabuli 90 - kumam bible

Sabuli 90

¹Rwot in en kabedo wan i kare dedede.

²Di pwodi likame kocweo mori, arabo di pwodi likame in icweo lobo kede piny, cako sek kede sek kiton tuno ikar kede ikar, in en kame ibedo Rubanga.

³In idwoko wan i apua, di iwaco be, “Dokunu, wun idwe ka dano.”

⁴Piento i wangin, mwakini tutumia acel iyapiyapi bala nyoro ka etieko kato, arabo erom aroma kede esawa atitidi me iwor.

⁵In iwearo kuo gi; gin kical bala lek, kical bala lum kame lot odiko;

⁶odiko elot di eko doko nyen, do otieno ener di eko tuo.

⁷Pien gero nin otieko wa; lilo ni obwono wa.

⁸In itieko keto dub wa i nyimi, dub wa kame otimo i mung in itieko delelo i nyimi.

⁹Lilo nin mio kare me kuo wa bedo cecek; kuo wa tiek bala kite kame dano omo kede wei.

¹⁰Kare me kuo wa tie mwakini ot kanyaare; arabo ot kanyauni ka otek, akadi bed kamanono da, kare nogo lung obedo me inyinyir kede me peko; doko da kitiek awakawaka di wan oko rwenyo.

¹¹Ngai bo kame ngeo twer me gero nin? Ngai kame ngeo lworo kame gero nin kelo?

¹²Pwony wa ngeno ceko me kuo wa, tetekeny obed kede cuny me rieko.

¹³Lok cunyi, Okwe Rwot! Kara in iyaro lilo kede wa pi kare kame rom amene? Mi kisa maki kede jotic ni!

¹⁴Pong kuo wa odiko acelacel kede amara ni kalikame lokere, me wek osobolo bedo kede kilel kede yomcuny pi kare me kuo wa lung.

¹⁵Mi wa obed kede yomcuny pi kare kame rom aroma kede kare kame in icano wa kede, doko kame rom aroma kede mwakini kame wan obedo neno kede peko.

¹⁶Mi jotic ni nen tice ni, doko idwe gi da nen tice nin adongodongo.

¹⁷Okwao bero ka Rwot Rubanga wa bed kede wa, di eko mino winyo i tice me cing wa; Okwe mi winyo i tice me cing wa!