Read kumam Sabuli 91 Bible Online

Sabuli 91 - kumam bible

Sabuli 91

¹In ngat kame ibedo i gwok me Ngamalo Twal, ngat kame dong bedo i gwok me Won Twer,

²ibino waco ne Rwot be, “In en kagwokere nango kede kateko na, Rubanga na kame ageno.”

³Piento en ebino laki ki owic kame kociko kede ki tuwo areco dedede;

⁴en ebino umi kede bwome, di in iko gwokere i bwome; genere mere en ebuku kame gwoki.

⁵Likame ibino bedo kede lworo moro iwor i kom gimoro arac, akadi lworo emal kame kogweo i dier i ceng,

⁶amoto tuwo areco kame mako jo iwor, arabo can kame muducaro jo i dier i ceng.

⁷Jo tutumia twero popoto piny di kiko to i ngeti, jo tutumia tomon i ngeti tetu cam, do likame tie gimoro kame bino timere ni.

⁸In ibino neno anena kede wangi alola kame komio jo areco.

⁹Pi kite kame in itieko mino kede Rwot odoko kagwokere ni, Won Malo Twal en kabedo nin,

¹⁰likame tie gimoro arac kame bino timere ni, likame can moro bino noko paco ni.

¹¹Piento en ebino ciko imalaikan mege piri, pi gin gwoki i kabedo dedede kame in ioto iye.

¹²Gin kibino tingi i cing gi tetekeny kur itwom tieni i wi engaro.

¹³In ibino nyono engu akadi emosoga kede tieni; in ibino nyonyono inguon atino kede twole.

¹⁴Rubanga owaco be, “Ango abino lako jo kame mara; abino gwoko jo kame ngea.

¹⁵Ka gin kilwongere buta, ango abino gamo dog gi; abino bedo kede gi i kare me peko, ango abino lako gi di ako mino gi kiudo wor.

¹⁶Abino mino gi kare alac me kuo, kame bino romo gi, di ako nyuto negi alako na.”