Read kumam Sabuli 94 Bible Online

Sabuli 94 - kumam bible

Sabuli 94

¹Okwe Rwot, in Rubanga kame culo kwor, in Rubanga kame culo kwor, nyut gero ni!

²Yai, Okwe ngangolkop me lobo; mi joewaka gikame poore kede gi!

³Okwe Rwot, jo areco bino tieko kare kame rom amene, kibino tieko kare kame rom kamene di kilelo?

⁴Gin kiyamo kope me ewaka; jo dedede kame timo gikareco wakere.

⁵Gin kitidilo jo ni, Okwe Rwot, di kiketo can i kom jo nin.

⁶Gin kineko apuserun kede jokumbor, kineko idwe kic da,

⁷di kiwaco be, “Rwot likame neno; Rubanga ka Yakobo likame ngeo.”

⁸Miero iniangunu, Okwe wun jo kame tam wu goro; wun jomingo, kara ibinunu doko riek awene?

⁹Benyo, en ngat kame ecweo yit jo, likame en ewinyo kop? Benyo, en ngat kame ecweo wang, likame en eneno?

¹⁰En ngat kame ebitaro atekerin, en ngat kame epwonyo jo kop me rieko, benyo, likame en ebino bitaro gi?

¹¹Rwot ngeo par wa, en engeo be kical bala yiro kame duny di eko rwenyo.

¹²Kitie kede winyo gin jo kame in ibitaro, Okwe Rwot, kede jo kame in ipwonyo iswil ni.

¹³In imio gin kiworaro ki peko, tuno di kotieko kunyo bur me ciko jo areco.

¹⁴Piento Rwot likame bino weko jo mege atatai; en likame ebino jalo jo kobedo mege.

¹⁵Pien ngolo kop i ateni bino dwogo i twale, di jo dedede kame cuny gi ber ko bino gango kop nono.

¹⁶Ngai kame bin okonya yi kede jo areco? Ngai kame bin okonya yi kede jo kame timo gikareco?

¹⁷Ka koto oudo Rwot likame oko konya, koto oudo kuo na okato awakawaka ot bedo i piny koling.

¹⁸Kakame oudo aparo kede be, “Tiena tie cer,” amara nin kalikame lokere en oko maka, Okwe Rwot.

¹⁹Kame par opong i cunya, in ikweo cunya di ako bedo kede yomcuny.

²⁰Benyo, in ikaruno bedo awotin kede jongolkop areco, jo kame tio kede iswil pi timo gikarac?

²¹Gin kicokere karacel pi dubo kuo me jo abeco, di kiko ngolo kop me to ne jo kame li kede raco moro.

²²Do Rwot otieko doko kateko nango, doko en Rubanga na, lela kame ango aringo ot gwokere iye.

²³En ebino culo gi kede raco pi dub kame kitimo, di eko tieko gi pitipit pi gikareco gi; Rwot Rubanga wa bino tieko gi pitipit.