Read kumam Sabuli 96 Bible Online

Sabuli 96 - kumam bible

Sabuli 96

¹Okwe werunu wer anyen but Rwot; werunu but Rwot, wun jo dedede me lobo!

²Werunu but Rwot, pakunu nyinge; tatamunu ceng dedede be en elako wa.

³Tatamunu kop me deyo mere but atekerin, kede tice mege me aura but jo dedede!

⁴Pien Rwot dwong doko miero pake twatwal; en kame miero mie wor kalamo rubangan dedede.

⁵Pien rubangan dedede me atekerin apat obedo caljwogi; do Rwot en ocweo malo.

⁶Wor kede dwongo tie bute; teko kede cilo tie i kabedo mere kacil.

⁷Okwe wun jo dedede, wacunu be deyo kede teko obedo me ka Rwot.

⁸Miunu Rwot deyo kame poore kede nyinge; kelunu giamia, di ikounu donyo i diakal mere!

⁹Worunu Rwot di ingapunu engape kacil; bedunu kede mielkom i nyime, wun jo me lobo lung!

¹⁰Wacunu ne atekerin be, “Rwot en abaka! Kotieko keto lobo kakare, likame tie gikame karuno yayango en. En ebino ngolo kop ne jo dedede i ateni.”

¹¹Bed kede yomcuny in malo, doko ida lobo leli; miero nam mori, kiton gi dedede kame tie iye;

¹²poto da leli, kiton gi dedede kame tie iye. Di do yen dedede ko bino wer pi kilel

¹³i nyim Rwot; piento en etie bino, etie bino pi ngolo kop ne lobo. En ebino ngolo ne piny kop i yore kopoore, ebino ngolo ne jo kop i ateni.