Read kumam Sabuli 99 Bible Online

Sabuli 99 - kumam bible

Sabuli 99

¹Rwot en abaka; jo dedede poore bed kede mielkom! En ebedo i kom mere me ajakanut i ngei cerubim; miero lobo yangere.

²Rwot pire dwong i Sion; komie dwongo kame kalamo me jo dedede.

³Wek gin kipak nyingi kame dwong, en nying me alwora. En ngat kacil!

⁴Abaka Won Twer, ngat kame maro gikame kotimo i yore me ateni, in en ikelo ngolo kop me ateni i Isirael; ikelo da kuo kopoore kede timo ne ngat acelacel bala kame poore ne.

⁵Pakunu Rwot Rubanga wa; worenu i nyim abanya mere me teno tiene. En ngat kacil!

⁶Musa kede Aaron bin obedo josaseredoti mege, Samuel da bin ngat acel kikom jo kame oudo lwongo nyinge. Gin bin kikok but Rwot di en eko dwoko kwac gi.

⁷En bin eyamo kede gi i epir me edou; gin kiko lubo iswilia mege kede cik kame en bin emio gi.

⁸Okwe Rwot Rubanga wa, in bin idwoko kwac gin; in bin ibedo Rubanga kame sasiro gin ki dub gi, do oudo itimo onyanga i kom gin pi gikareco kame gin oudo kitimo.

⁹Pakunu Rwot Rubanga wa, doko worenu i wi moru mere kacil, pien Rwot Rubanga wa cil.